Shillong, Risaw, 17: Ka Seng Samla Catholic Mawkynrew Parish kum shi bynta ban khring ia ki paidbah sha ki jaka jngoh kai pyrthei ha ka thaiñ Mawkynrew kan pynlong da ka Sohphlang Festival ba shisngi bad ruh ban pyni nam ia ki jingbam tynrai ba ka dong ka thain ka pynmih.
Ha ka jingiakren bad ki lad pathai khubor u Nongaibuit jong ka Seng Samla ka Parish u Bah Carmel Lyngdoh u la pynpaw ba kane ka tamasa bam Soh Phlang kan dei ha ka sien ba nyngkong eh ban sa pynlong ha kane ka jylla.
U Bah Pynbianglang Kshiar uba long u President jong ka Seng Samla Parish Mawkynrew u la pynpaw ba ia kane ka tamasa yn pynlong ha ka 21 tarik mynta u bnai phyllaw jong ka Holy Cross School, Mawkynrew.
Ka jingthmu ban pynlong ia kane ka tamasa ka long ruh kum shibynta ban kyntiew ia ki nongrep Soh Phlang jong ka thain kum ha ka shnong Mawleiñ, Pingwait nalor kiwei pat.
