Shilllong, Risaw 17: Ka Deputy Commissioner jong ka East Khasi Hills District ka Kong RM Kurbah ka la thung da ka Magisterial Enquiry ne ka jingtokit majistor halor ka jingpluh jong ka iing mala ki Singhania ha ka 14 tarik mynta u bnai ha Thana Road, Khyndai Lad kaba long ruh ka kad khaii kaba ju thnem da ki nongdie bad ki nongthied hynrei kaba khapngiah ha ka leit ka wan.
U Sanjay Goyal uba long u Commissioner & Secretary uba peit ia ka tnat Revenue Disaster Management jong ka Sorkar Jylla ha ka jingiakren bad ki lad pathai khubor u la ong ba ka Deputy Commissioner ka ladep thung ia ka jingtohkit majistor bad la khmih lynti ba ia ka kaiphod yn sa aiti hapoh ka 10 sngi.
Ia kane ka jingtohkit yn khlieh da u Additional Deputy Commissioner ban tih bniah ia ka daw tynrai halor ka jingsdang jong ka ding kaba la pynkylla dpei ia ka ïing jong ki Singhania ha Khyndai Lad.
U Goyal u la iathuh ruh ba ka Sorkar Jylla ka la rai ban pynlong da ka jingtohkit ban lap haduh katno tylli ki ïing Sorkar bad ki ïing jong ki riewshimet kiba la kynjoh sha ka rta kaba 50 haduh 70 snem ki long kiba shngain haba jia kum kine ki jingjia ki bym poi pyrkhat.
U la ong ba ka Sorkar kan sa wad ia ka Professional Agency ka ban peit bad ka ban sa bishar bniah ia ka jinglong jingman jong ki ïing mala jong ki paidbah kiba la rim bad ki ïing jong ka Sorkar khnang ban iada lypa lada jia ba wan lynshop kano kano ka jingjia kaba sngewsih ha ka khyllipmat bym poi pyrkhat.
