Shillong, Rymphang 20: Ka Sorkar Jylla ka la rai ban pynbun shuh shuh ïa ki Police Outpost bad ki Border Outpost khamtam ha shilynter ka khappud jong ka jylla da kaba thungkam palat lai hajar ngut ki Pulit.
Haba jubab ïa ka jingkylli, ba la wanrah da u MLA ka Congress na Mawhati Charles Marngar, halor ka jingshah pyndik ki paidbah khamtam ha ki jaka ba don ka jingïakajia pud hapdeng ka Meghalaya bad Assam, u Myntri Rangbah ka Jylla u Conrad K. Sangma u la ong, ka Sorkar Jylla ka la pynkhlaiñ shuh shuh ïa ka tnat Pulit khamtam da kaba buh ïa ki Border Outpost bad ïathuh ruh ba la nang pynbun shuh shuh ïa ki nongtrei ha ki Border Outpost barim bad bun tylli ki Border Outpost ba thymmai ladep ban pynkha khnang ban pynthikna ïa ka jingshong shngaiñ jong ki paidbah ha khappud.
U Sangma u la ïathuh ba ha ki khyndiat bnai baladep, ka Sorkar ka la pyndep ai ka jingthungkam haduh 996 ngut ki Pulit, tang ban phah sha ki Border Outpost, watla ki don ki kam ba la mang, hynrei ïa ka jingpynrungkam ym pat lah ban pyndep bad mynta ki dang sah thylli.
U la ïathuh ba ka Sorkar ka la rai ban pynlong noh ïa ka jingthungkam na ka bynta 3,108 ngut ki Pulit.
“Kine ki kam (ba dang thylli) ha ki Outpost ba la don lypa bad ha ki Border Outpost. Tang shu dep ka jingthungkam ïa ki 3108 ngut ki Pulit, yn sa aikam ïa ki bad ha kata ka por ngin sa ïohi ïa ka jingkhlaiñ ki bor pahara jong ka tnat Pulit,” la ong u Sangma.
U la ong ba ka Sorkar Jylla ka la leh bin pa bin da kaba sdang shwa na ka Engineering Wing hapoh ka tnat Pulit.
“Kane ka la ai laitluid ïa ki SP bad ban pynlut na ka bynta ki Outpost bapher bapher bad ban shna ïa ki ing treikam khlem da donkam shuh ban leit shwa na ka Engineering Wing jong ka tnat PWD lane na kino kino ki Agency,” u la bynrap.
