Shillong, Rymphang, 20: Ki nongtrei iing briew kiba don hapoh ka shatri jong ka All Meghalaya Domestic Workers Association (AMDWU) ha ka sngi Baar ki la pynpaw ïa ka jingsngew bynñiaw halor ka jingleh bym patiaw jong ka Sorkar Jylla la 12 snem tam halor ka jingdawa ban ithuh noh da ka aiñ ïa ka kam kaba ki trei.
“Ngi la phah la bun tylli ki dorkhas sha u Myntri Rangbah hynrei haduh mynta kam don kano kano ka jingai jubab na ka liang jong ka Sorkar,” la ong ka Vice President ka Union ka Kong Elbina Nongkhlaw ha ka jingïakren bad ki lad pathai khubor.
“Nalor ba ngim dei ki briew kiba duk, ngi ïoh ïa ka jingsiew kaba rit ban pyndap ïa ka ïing ka sem bad ban trei bun kynta. Nalor ba ngi shah khate ka jingsiew bainong haba ngi pep bylla. Ngi dawa ïa ka Sorkar ba kan pyntreikam da ka Welfare Scheme na ka bynta jong ngi,” la ong ka Kong Nongkhlaw.
“Watla ka dor ka mur ki marbam mardih ki kiew ne ki hiar, ka long beit kumjuh bad kiba ïap dei ma ngi kiba duk kiba shu bylla im kamai jakpoh da kaba leit bylla ha ïing ki briew,” ka la ong.
Haba kylli, ka la ong, “ngi dawa ïa ka Sorkar ban ai jingïada da kaba buh ïa ka dor trei da kaba pyntreikam ïa ka Welfare Board. Dei ban kynthup lang ïa ki nongtrei ing briew ha ka thup ki nongtrei katkum ka jingpynbna ba la pynmih ha ka Minimum Wages Act, 1984, bad ban pyntreikam ruh ïa ka dor bylla sngi.”
“Lyngba ka Welfare Board ngi kwah ïa ka Sorkar ban lum jingkheiñ ïa ka jingdon jong ki nongbylla iing briew, ban ai jingïarap haba ki ïakynduh ïa kino kino ki jingjia ha ka jingim jong ki, ban ai jingïarap ha ka pang ka shitom na ka bynta ka bai sumar, ban ïa ka jingïarap haba kha khunlung bad kiwei kiwei. Dei ban thaw ruh da ki kyndon ïa ki kam ban trei bad ban pyntreikam ïa ka jingsiew katkum ka Minimum Wages Act,” la ong ka Kong Nongkhlaw bad bynrap, “ki aiñ ïada ïa ki nongbylla (Labour Laws) kim ai jingïada satia ïa ki nongtrei ha ki ing briew.”
Katkum ka jingïathuh jong ka Vice President ki don palat lai hajar ngut ki nongtrei ing briew kiba la rejister kyrteng ban long ki dkhot jong ka AMDWU.
Halor ka jingshah thombor ka longryngieng jong ki nongtrei ing briew, ka President jong ka Union ka Kong Patrisha Riahtam, ka la kam ba ka Union ka la ïoh ujor la bun tylli kum kine ki jingjia.
“Haba don ki jingshah thombor ki dkhot jong ka Union ngi ju shimkhia kum ka Union. Ki la don teng ki jingjia haba ki nongtrei ing briew ki shah leh be-ijot bad shah pyndik laiphew jait bad mar mar ka Union ka ju pan jingïarap na ki bor Pulit,” la bynrap ka Kong Riahtam.
“Namar Kata, ngi dawa ïa ka Sorkar Jylla bad ïa ka Sorkar Pdeng ba kin wad ïa ki lad ki lynti ban wanrah da ki polisi bad wanrah da ka aiñ ka ban ïada ïa ki nongtrei ing briew,” ong ka ong Riahtam.
