Shillong, Naitung 12: Ki MDC jong ka Khasi, Jaiñtia bad Garo Hills Autonomous District Council ha ka sngi balang da kawei ka jingmut ki la iakren sani bha ban pyrshah halor ka jingthmu jong ka Sorkar India ban pyntreikam ia ka Uniform Civil Code (UCC) ha baroh kawei ka ri India.
Ha jingiakren bad ki lad pathai khubor hadien ba la wai ka jingialang, u Chief Executive Member (CEM) jong ka Khasi Hills Autonomous District Council (KHADC) u Bah Pyniaid Sing Syiem u la iathuh, baroh lai tylli ki Autonomous District Council (ADC) ki la shim ia ka rai da kawei ka jingmut ban ieng pyrshah ia ka jingthmu jong ka Sorkar India ban pyntreikam ia ka Uniform Civil Code (UCC) ha Meghalaya bad ha kajuh ka por u Bah Pyniaid u la iathuh ba ki lai tylli ki Autonomous District Council (ADC) kin sa phah da ka Resolution ha ka 14 tarik mynta u bnai sha ka Law Commission bad sha ka sorkar India ban pynpaw ia ki nongrim kiba shai halor ka jingpyrshah ia ka UCC.
U la iathuh ba watla ki lai tylli ki Autonomous District Council ka jylla kim pat ioh ia kano kano ka jingthoh na ka Law Commission hynrei ki la shim hi da ka rai ban phah jingthoh sha ka Commission ban pyrshah ia ka UCC.
“Nalor ka jingthoh ban pyrshah ia ka UCC, ka Resolution ba ngin phah sha ka Law Commission ka long ruh ban ai jingai jingmut sha ka Commission, ba balei ki Autonomous District Council bad ki paidbah nongshong shnong jong ka jylla Meghalaya ki pyrshah jur ia ka UCC,” la ong u Bah Pyniaid.
U Chairman jong ka High Power Committee ka GHADC u R.K. Sangma u la ong ba ka Garo Hills Autonomous District Council (GHADC) ka ladep mynjur da ka Resolution ban pyrshah ia ka UCC hadien ba ladep lum jingialang ia ki sengbhalang bad ki Nokma bad ha kine ki jingialang la shim ia ka rai ban pyrshah beit ia ka UCC.
