Shillong, Jymmang, 30: Da ki hajar ngut ki samla pule na ki skul bad ki kolej bapher bapher kiba don hapoh ka jylli jong ka Sor Shillong ha ka sngi baar ki la ïashim bynta ha ka jingïaid paidbah lane ka Hynñiewtrep Youths’ March ba la pynlong da ka Hynñiewtrep Youths’ Council (HYC) Central Body.
Ka jinglum lang jong ka HYC ïa ki samla pule ban ïaid paidbah ha kane ka sngi ha nongbah Shillong ka long kum shi bynta ban ai jingkyrshan ïa u President jong ka Voice of the People Party (VPP) u Bah Ardent Miller Basaïawmoit uba dang bteng ïa ka jingshah jingit mynta la phra sngi kynthih ban pynbor ïa ka Sorkar Meghalaya Democratic Alliance (MDA) ba ïalam da ka National Peoples Party (NPP) ba kan bishar bniah biang ïa ka Reservation Policy.
Ïa kane ka jingïaid paidbah la sdang nakhmat ka ophis treikam jong ka Meghalaya Board of School Education (MBoSE) Regional Office, Shillong bad ïaid ter ter na Lachaumiere, Barik Point, IGP Point bad la pynkut pat ha ka jaka shah thngan jong u Bah Ardent ha Parking Lot kaba don markhap bad ka ophis Additional Secretariat, Shillong.
U General Secretary ka HYC u Bah Roy Kupar Symrem ha ka jingïakren bad ki lad pathai khubor hadien ba la kut ka jingïaid paidbah, u la ong, ka jingïaid paidbah da ki samla pule ka long ban ai mynsiem ïa u Bah Ardent bad ban pynbor ïa ka Sorkar Jylla ban khmih biang ïa ka Reservation Policy kaba la pyntreikam la 51 snem mynshwa.
“Ka Reservation Policy ka dei ka bih kaba ngi kum ka jaitbynriew ngi la kbum ha la ka shyntur mynta la sanphew snem kynthih ka la kylla long pynban ka jingpang kaba la bam ïa ngi napoh namar lada ngi peit ha ka lait kam lait jam ha kine ki sngi katno ngi shah leh beiñ bad kat haba lait ki kam kiwei ki jaitbynriew ki ïoh kam bun ka bhah katba ma ngi, ngi ïoh duna,” u la ong.
