Shillong, Jylliew 09: Ka jingwan jong ki missionary sha kane ka thain shatei lam mih ngi kala long shisha kaba ai jingmyntoi shi katdei eh ia ki riew lum jong kane ka thain ha kiba bun ki liang. Haduh mynta mynne ruh ka jingnoh synniang jong ki ka dang iai bteng.Ka jingdon jong ka jingiasyllok ki salesian of Don Bosco ha ka jylla jong ngi ruh ka long ka jingtrei kam ba jar jar hynrei kaba iarap pat khamtam eh ia kiba duk ba rangli bad ka jingdon jong ki khynnah ba duna ha ki dkhot met.
Ha u snem 1989 ka kynhun ki salesian of Don Bosco hadien ka jinglap ia ka jingdon bun ki khynnah jem shyieng hapoh ka shnong Mawlai kila seng noh ia ka Caring for Children with Disabilities kaba don shadien jong ka Theological College hapoh ka jingpeit u Rev Father CM Jose.
Ha kaba iadei bad kane ka jingai dawai jem shyieng ki don ki doctor kiba la shu wan ban trei khlem jingsiew hynrei kila shu wan ban iarap ban ai jingsumar ia ki khynnah kiba don ka jingshitom bad ia kane ka medical camp la ju ynlong man u bnai kata ka sngi u Blei ha ka taiew ba nyngkong jong u bnai.Ia kane ka jaka ai dawai jem shyieng ka burom baroh ka leit sha kito kiba don ia ka mynsiem ban iarap bad khlem da jer kyrteng kila long kiba la kloi ban ai ka kti kamon bad ka kti kadiang ban pynlong ia kane ka jaka ai dawai ba kan long kumba ka long haduh mynta.
Hadien ka jinglap ba ki dang don shibun ki long iing hapoh Mawlai kiba shu long pdeng ka jingduk bad ka jingkyrduh bad da ka mynsiem ban kyntiew ia ka pule puthi sha ki khynnah kiba wan na ki long iing baduk, ha u snem 2003 hapoh ka jingialam u Rev Father Mathew George kila seng noh sa ia ka skul na ka bynta ki khynnah baduk ba rangli khlem da don kam jingsiew ia kaba la tip kum ka Caring Literacy Programme, bad kane ka jaka ka don ha Sacred heart Boys Lower Primary skul ha Mawlai Phudmuri, Shillong.Ia kane ka skul haba ki khynnah skul ki wan kim donkam satia ban siew bai skul bad namar ba kam pat don ia la ka jong ka skul building, na ka liang ki father ki pynlong skul hadien ba la wai ki khynnah skul Lower Primary jong ka Sacred Heart, Mawlai.
Ka Batesi TV kala ioh jingtip ba ki khynnah skul ynda kila dep ka jingpule na kane ka shlem ai jinghikai mynta hapoh ka jingpeit u Rev Father CM Jose ynda kila leit skul shawei ruh u iarap ban siew bai skul bad kyrshan ruh ia ki ha ka bai klas bad shibun bha kiba ioh kam ha ka jingim ka jong ki.
Haba kylli ba naei ki ioh pisa ban kyrshan ia kine ki khynnah u Rev Father CM Jose u la iathuh ba u la ioh ia ka jingnoh synniang na ki para father, ki riew shimet bad kumjuh ruh kiba ha iing ha sem jong u.
Ha kawei pat ka liang kala long shisha ka jingkyrkhu ba khraw na ka bynta ki paidbah kiba duk bad ba rangli kiba ym kot bor ban shna iing sha sem, hynrei da ka jinglong ba la kloi u Rev Father CM Jose u la lah ban iarap ia kiba duk ba suk da kaba pynshna iing ei ia 24 tylli ki long iing ha Nongkohlew.Ia kane ka dong ba shong basah kine ki 24 tylli ki long iing la jer kyrteng kum ka dong Don Bosco bad kane ka don mar pyrshah bad ka ranap lum ba jyrngam bha bad kane ka jaka long shisha kaba itynnad bha.
Man kawei pa kawei ka long iing, na ka liang u Father ula ai ia ka pata ha ka kyrteng jong kine kiba ioh bynta bad kane ka shnong kala biang ruh halor ka jingdonkam ba man la ka sngi kum ka umbam umdih bad kumjuh ruh ka bording electric.
Ban poi sha kane ka dong u Father u la hap ban pynlut ruh sa ban shna surok ka ban pynsuk ia ki paidbah ha ka leit ka wan, hynrei haba phai sha ki nongmih khmat kam shym la don satia kiba long la kloi ban iarap na ka bynta ka surok bad la shu leh beit na ka bor jong u Father.
Ban pyntikna ba kine ki briew ba kin pyndonkam hok ia kine ki iing ba la pynshna u father Jose bad ka shnong kila iateh kular ba kine ki trai iing kim lah ban die noh ia ka jaka ne ia ka iing hynrei ban aiti biang sha u father Jose lada kim kwah sah shuh khnang ban ioh ai pateng sha kiwei de kiba donkam.
