Shillong, Jylliew 08: ïa ka met jong ki ar ngut ki nongbylla tih dewïong na Ri Bhoi District, kiba la shah tep im ha ka jingtwa ka khyndew kaba la set sbak ïa ka krem tih dewïong ha Tinsuki, Assam la lap ha ka sngi Saitjaiñ hadien ka jingwad ïa ka met jong ki haduh khatsaw sngi kynthih.
Kum ban pynkynmaw hangne, ki arngut ki nongbylla kiba la shah tep im ha ka jingtwa ka khyndew katba ki dang leit bylla ha ka krem dewïong ha Tinsokia, Asssam ki kynthup ïa u Phingal Umbah 24 snem na ka shnong Shnah Tyrkhang bad uwei pat la tip kyrteng kum u John Nongrum 39 snem na ka shnong Umsohlait ha kaba dang shen ki la ngat ha kane ka apot kat haduh ba ki la duh syndon ïa la ka jingim.
Kane ka la jia ha ka 24 tarik u bnai baladep ha ka por kumba 12 baje mynsngi. ïa ka met jong ki arngut ki nongbylla la ïoh sei da ka jingtrei shitom jong ka kynhun National Disaster Response Force (NDRF) bad ka State Disaster Response Force (SDRF).
Ha ka jingïakren bad u Superintendent of Police ka Ri Bhoi District u Jagpal Singh Dhanoa u la pynthikna ba la lap shisha ïa ka met jong ki ar ngut bad haduh mynta ka met jong ki ka dang don sha sha ka jaka ba la twa khyndew bad ki bahaïing kin sa leit ban shimti ban wan kit noh sha la shnong.
U la ong ruh ba ki bor Pulit ka Ri Bhoi kin sa ai jingïarap ban leit synran ïa ki bahaïing na ka bynta ban leit shimti ïa ka met jong ki ar ngut ki nongbylla khnang ban pynpoi shaduh sha ka shnong jong ki.
Ha ka jingïakren bad kawei na ki bahaïing jong uba la ngat ha ka apot twa khyndew, ka Kong Olida Mukhim ka la ïathuh ba ki la ioh jingtip ba la lap ïa ka met jong ki ar ngut bad na ka liang ki bahaïing ki dang pynkhreh ban leit sha katei ka jaka na ka bynta ban shimti ïa ka met ba dang sah jong ki ar ngut ki lanot.
Ka la ong ruh da ka jingïarap lem ki bor Pulit na Ri Bhoi ki kyrmen ban leit lang sha ka jaka ba la ïoh set ïa ka met khnang ban lah ban pynpoi suk ïa ka met ba dang sah jong ki ar ngut sha ka shnong kaba ki sah.
