Shillong, Naitung, 28: Ki mynder na ka ri Bangladeshi la sakhi ba ki la wan kiew da ki lieng shajan ka shnong Dangar, kaba hap hapoh ka East Khasi Hills District da ka jingthmu ban kit maw bad kaba lyngngoh ka long ba ki shipai Border Security Force (BSF) kiba ap pahara ha Dangar Border Outpost (BOP) ki shu pyllait lan khlem leh eiei ban pynher krad ia ki mynder na u pud u sam jong ka ri India.
Ka Khasi Students Union (KSU) South West Khasi Hills District bad ka KSU Balat Border Area Circle ki la pynpaw ïa ka jingsngewkhia halor kane ka jinglong jingman bad ka jingïohlad jong ki mynder ri na ka ri Bangladeshi ban kiew laitluid shaduh u pud u sam jong ka ri India bad kane ka pyni ba imat ka lah ban don ka jingiasngewthuh jingmut hapdeng ki shipai ïada khappud (BSF) bad ki mynder ri na ka ri Bangladesh.
Ka seng ka la ong ba kane kan buh jingma bha ruh ïa ka jaitbynriew rit paid ha ka jylla Meghalaya namar lada ka paw kumne khlempep kane kan pynsuk ruh ïa ki briew ki bym dei ki nong India ban pynlong ïa ki ktem shipai kum ki jaka rung tuh ha kaba na kine ki jaka kin kiew bad leit buh-ai shnong sha kiwei kiwei ki jaka jong ka Bri u Hynñiewtrep.
Ka seng ka la dawa ïa ki bor synshar jong ka East Khasi Hills District bad kumjuh ruh ïa ki bor synshar jong ka South West Khasi Hills District ba ki dei ban tuklar mardor halor kane lym kumta ka seng kam banse ban hap hiar hi sha kito ki thaiñ bad ban shim ïa ka sienjam da lade hi lada kum kine ki dang iai jia ha ki por ban sa wan.
