Shillong, Nailar, 11: Ki shipai BSF kiba ap pahara ha khappud ki la hap ban siat pyntieng sha suiñ ïa ki mynder na ka ri Bangladesh kiba wan tur da ki lieng kynda lyngba ka Wah Lalpani ban khlong maw bad shyiap ha ka taiew baladep.
Ïa kane la pyntip da ki shipai BSF ha u MLA jong ka Mawsynram Constituency u Bah Olan Sing Suiñ uba la leit jurip ïa ka khappud ha ka sngi Thohdieng jong ka taiew baladep ban pynthikna ïa ka jingshngaiñ jong ki nongshong shnong kiba shong basah ha ki shnong khappud jong ka Mawsynram Constituency namar ka jingïakynad kaba jur kaba la khie ha ka ri Bangladesh. U MLA ryngkat bad u Officer Incharge jong ki san tylli ki Border Out Post u Rajiv Kumar ki la shong jingïalang shwa bad ki Commandant jong ki san tylli ki Border Out Post ha Dangar Border Out Post ryngkat bad ki nongïalam jong ki shnong khappud ban ïathir ïatai sani halor ka jinglong jingman ha khappud.
Ki san tylli ki Border Out Post (BOP) ki kynthup ïa ka Barman Bari BoP, ka Dholai Naga BoP, ka Sonatola BoP, ka Betgora BoP bad ka Pornonagar BoP.
Kane ka jingshimkhia jong u MLA ka Mawsynram Constituency ka long ban pynthikna ba ki mynder kim dei ban ïohrung beaiñ sha ri India ha kum kane ka por ba ka ri Bangladesh ka dang don hapdeng ka jingïakynad.
U MLA u la ïaroh ïa ki shipai BSF kiba pahara khappud jong ka shnong Lalpani kaba hap hapoh ka Dangar BoP.
“Ngi sheptieng ïa ka jingjia ha ka ri Bangladesh bad ngi sheptieng ïoh ba ki mynder kin wan rung beaiñ shapoh u pud sam jong ka ri ha kano kano ka por. Ngi la ïakren ruh bad ki bor Pulit ba kin peitngor ba ka jinglong jingman (ha ka ri Bangladesh) kan ym buh ïa ngi ha ka jingshong syier bad ïa ki paidbah kiba shong basah ha kane ka shnong ha khappud,” ong u Bah Suiñ.
U Officer Incharge jong ka tnat shipai BSF u Rajiv Kumar, u la pyntip ruh ha u MLA ba ha ka taiew ba ladep da ki spah ngut ki mynder na ka ri Bangladesh ki la wan tur da ki lieng ban khlong maw bad kit ïa u shyiap.
“Ki shipai BSF ki la siat kuli ban pyntieng ïa ki mynder bad mynta ka jinglong jingman ka la shngaiñ bad ki mynder kim shym la nud ban shuh ban wan,” u la ong.
“Mynta ki BSF ki la pahara ïa ka khappud miet la bad sngi ban pynthikna ba ki mynder na ka ri Bangladesh kim dei ban ïoh rung beain shapoh u pud u sam jong ka ri India,” la ong shuh shuh u Bah Suiñ.
U la kyrpad ruh ïa ki Rangbah Shnong naduh ka shnong Lalpani, Dangar Dop, Dangar ban ïatreilang ryngkat khnang ban pynthikna ba kin ym don shuh kino kino ki jingjia hapoh u pud u sam.
