Shillong, Naitung, 24: Ki Pulit ka tnat pynïaid kali ka Shillong Traffic Police (STP) ki la ïoh bat haduh 109 tylli ki kali kiba tah ïa ki plastic rong iong ha ki iit jingkhang kali bad daiñ kuna ruh ïa ki trai kali kiba pynkheiñ ïa ka aiñ.
U Superintendent of Police ka East Khasi Hills u Bah S. Nongtnger ha u kyrwoh ba la phah sha ki lad pathai khubor u la ïathuh ba ki Pulit ki la pyrkhing ïa ka jingtah plastik rong iong ïa ki iit jingkhang ha ki kali ban ïada bad ban khanglad ïa ki kam runar ruser bad ki kam sniew kam smeh.
U la ïathuh ba katkum ka aiñ Motor Vehicles Act bad da kaba bud ryntih ïa ka hukum ba la pynmih da ka Ingbishar Supreme Court la mana ïa ki trai kali ban tah da ki plastic rong iong ha ki iit jingkhang kali bad kiba pynkheiñ ïa kane ka hukum kin ngat ha ka jingshah daiñ kuna.
U SP u la ong ruh ha kaba ïadei bad kane ki Pulit jong ka East Khasi Hills District kin pynthikna ïa ka jingshngaiñ ka leit ka wan ha surok bad ban khanglad ruh ïa ki kam runar ruser bad ha kajuh ka por u la kyntu ïa ki trai kali ba kin bud ïa ki kyndon kiba la bthah khnang ban lait na ka jingshah daiñ kuna.
