Shillong, Nailar 24: Khasi Students’ Union (KSU) Wahthapbru Unit ha ka sngi Thohdieng ka la rakhe kynmaw tympang ïa ka lyngkhuh sngi ïap ba 24 snem jong ki arngut ki nongïalam ba shitrhem ka seng kiba kynthup ïa u samla Dawanbiang Shullai, uba bat ia ka kyrdan Asst Finance Secretary jong ka KSU CEC bad u samla Rocky Shylla uba bat kum u Sport Secretary jong ka KSU Wahthapbru Unit kiba la kyllon ïap ha ki ktang suloi ki Pulit ka jylla Meghalaya.
Kum shu pynkynmaw ba kine ki arngut ki nongïalam ba shitrhem jong ka KSU ki la shah bthat jubor la ka jingim ha ki Pulit ka jylla Meghalaya ha ka 23 tarik, Nailar, 2000, ha Nongshiliang Shillong katba ki dang ïa shongkai ha kawei ka ïing bad u Balajied Dkhar ba ju khot sin u Hepkhoit uba dei u dkhot jong ka HNLC, hynrei kum ha kane ka por kyndit kynsan ki Pulit ka jylla Meghalaya kiba leit khynra ïa ka ïing ki la synreit kuli naphang ïa ki laingut ki samla Khasi da ka jingsuba ba ki dei ki dkhot jong ka kynhun lehnoh NSCN-IM, ong u kyrwoh ba la phah da ka KSU Wahthapbru Unit.
Ka KSU Wahthapbru Unit kan ïai pynkynmaw ba ka dei ka sngi kaba dum tam ïa ka jaitbynriew bad kum ka seng daleilei kan ym lah ban shu klet noh ïa ki dakmong kiba la kylla sohkhliang bad shijunom ka seng kan pyrto nam ban pynsah jingkynmaw ïa ki nongïalam bad ki dkhot kiba la leit hashuwa bad kiba lah phah ïa la ka jingim na bynta ka dawbah jong ka Ri ka jaitbynriew, la ong u kyrwoh ba la phah da ka seng.
“Ngi ïohi ruh ba haduh kat ha kine ki sngi na ka liang ka tnat Pulit ka thrang eh hir hir ban khylliap lama noh ïa ka seng KSU da ka jingpharep ba har rukom da ka jingpyrshang ban pyntieng koh tympan ha kiba bun ki liang ïa ki dkhot da ka jingbom jingtied, ka jingset phatok bad wat haduh ban shim syndon ïa ka jingim jong ki dkhot ka seng ruh kim salia shuh hynrei kynmaw ba kine kiei kiei baroh kim lah ban pynkhyllem ïa ka jinglong rangbah ka seng bad ka nongrim ba skhem jong ki dkhot bad kumba nangphrang shuh shuh ïa ka mynsiem ïaleh ka bym pyndem na bynta ban ai ïa ka jingshakri bahok ïa la ka Ri bad ka jaitbynriew,” ong u kyrwoh na ka Seng.
Ka KSU Wahthapbru Unit ka phah ruh ïa ka jingsngewlem sha ki bahaïing hasem jong kine ki lai ngut ki samla.
