Shillong, Naiwieng, 09: Dang step phyrngab ha ka por kumba 2:00 baje mynstep sngi Saitjain ki samla pule ka skulbah NEHU ryngkat ka jingdonlang jong u President ka KSU u samla Lambokstarwell Marngar ki la tur sha ka Quarter basah u Vice Chancellor u Prof PS Shukla ha skulbah NEHU ban pyrta ïa ki sur pynrem.
Lyngba ki video ba la phah da ka KSU Seng Kmie sha ki lad pathai khubor, la ïohi ba ki samla pule ki la thang ding hakhmat ka khyrdop jong ka ing sah u Vice Chancellor kaba don hapoh ka skulbah NEHU ha kaba ki nong ap pahara ki la shu long tang ki nongpeit kai.
“VC resign”, “Go Back, go Back” “No solution, no rest,” “VC step down” ki dei ki sur pyrta da ki samla pule.
Ka KSU ka la phah ruh ïa ka dur sha ki lad pathai khubor ba ki samla pule ki la thiah baroh shimiet haduh ban da shai ka bneng hakhmat ka khyrdop jong ka ingsah u Prof. Shukla kum ka dak ban pynjur shuh shuh ïa ka jingïakhih.
Ka jingïakhih jong ki samla pule ka NEHU ba la pynlong da ka NEHUSU bad ba la kyrshan lang da ka KSU NEHU Unit ka la kynjoh mynta palat 100 kynta naduh ba la sdang ïa ka jingshah thngan ha ka shiteng sngi ka 5 tarik mynta u bnai.
Ha kine ki 100 kynta tam, ki la don ruh ki samla pule kiba la tlot ka bormet bad kem pang ha kaba la pynkit noh ïa ki sha Civil Hospital, Shillong.
Tang shu ïoh jingkoit, ki samla pule ki la wan phai biang sha NEHU ban bteng ïa ka jingshah thngan.
Napdeng ki samla pule ba shah thngan, u samla Meban Kharmawlong uba bat ïa ka kyrdan Publicity Secretary ka KSU NEHU Unit u la kem kyllon kynsan bad kem pang namar ka jingtlot na ka jingtrei trei miet la bad sngi ban pynthikna ba ka jingïakhih jong ki samla pule ka skulbah NEHU kan long kaba ïaid beit ïaid ryntih.
Ïa une u samla uba la kem pang ha ka sngi Saitjaiñ la pynkit noh sha Civil Hospital, Shillong ban ïoh jingsumar tangba kham hadien katto katne por la pynkynriah noh sha NEIGRIHMS Hospital namar ka jingjur shaba palat ka jingshitom ha kaba la pyntip ba ki doktor ki la hap ban leh ïa ka Magnetic Resonance Imaging (MRI).
Ka khubor ba la ïohlum na ka KSU Seng Kmie ka la pyntip ba u samla Meban Kharmawlong u la shah sumar ha Neurology.
