Jowai, Nailar, 17: U Myntri Rangbah ka Jylla u Conrad K. Sangma ryngkat u Symbud Myntri Rangbah u Bah Sniawbhalang Dhar ha ka sngi Palei ki la iashim bynta ha ka ‘8th Annual General Meeting’ jong ka All Jaiñtia Muster Roll Workers & Labour Union, Central Executive Committee (CEC) ryngkat ka jingiatreilang bad ka Union of Cook cum Helpers PM Poshan, Meghalaya, Jowai kaba la long ha Madan Kawang, Ummulong.
Da ki phew spah ngut ki nongtrei Muster Roll ha ki tnad sorkar bapher bapaher, ki nongshet ja sngi Mid Day Meal, ki Misteri bad baroh ki nongbylla sngi kiba don hapoh ka East bad West Jaiñtia Hills District ki la iashim bynta ha kane ka lympungbah.
U Myntri Rangbah haba kren ha kane ka sngi kum u Kongsan u la pynpaw ka jingsngewkmen ban ïadon bynta ha kane ka sngi leh burom ka AJMW&LU ïa u. U la ong ka jingwan khnang mynta ka sngi kum ka Sorkar ka long ban ai jingkyrshan ïa ki nongtrei Muster Roll bad ong ruh ba ka jingpoi jong u sha ka kyrdan Myntri Rangbah ka dei lyngba ka jingpynïaid jong U Blei kaba u khlem poi pyrkhat ïa kane namar ha u snem 2018 um shym la long u MLA.
Hapdeng ki jingïaid lynti jong ka Sorkar hapoh ka jingïalam ka NPP naduh u snem 2018 ka la ïa kynduh shibun ki jingeh, hynrei ka Sorkar kam shym la kynran dien ha ka rukom treikam naduh ka kynhun Myntri sha ki MLA, na ki Chief Secreatary sha u IAS ophisar, na ki MCS sha ki Engineer tad haduh ki nongrep bad ki khun samla bad kane ka Sorkar ka long ïa baroh naduh kiba heh haduh kiba rit, ong Myntri Rangbah.
U la pynsngew naduh ki snem kiba la leit na ka liang u Bah K. Pariat bad u kiba ju ïakren ïa ka jingeh kaba ki nongtrei Muster Roll ki ïa kynduh, kumjuh ïa ki nongshet ja sngi ha ki skul wat ha ka por ba um pat long u Myntri Rangbah. Hynrei naduh u snem 2018 ha ka jingïalang ka kynhun Myntri ha ka sien kaba ar la shimkhia ïa kane jingeh jong ki Muster Roll ban pynïoh noh ïa ka tulop kaba manla u bnai kumba ïoh lem kiwei bad ban kyntiew ïa ka tulop manla u snem.
U la ong ruh ki paidbah ki tip khambha ïa ki kam ba kane ka Sorkar ka la leh bad ha kane ka kynti ka Sorkar hapoh ka jingïalam ka NPP ka la ïoh ban wan biang ha ka bor namar ka jingshañiah jong u paidbah. “Hooid ki don shibun ki jingshah kynthoh hynrei kum ka Sorkar kan ïai trei na ka bynta ka jingbha jingmiat jong ka jylla hi baroh kawei da kaba wanrah ïa ka jingkylla ha kine ki sngi ban wan,” u la ong.
Ha kaba ïadei bad ka dorkhas ba la aiti da ka AJMW&LU u Myntri Rangbah u la kular ban pyntreikam kat ka bor jong u na ka bynta ki mat jingdawa, wat lada ym lah ban pyntreikam ïa baroh.
Kum ka dak ka jingburom ïa ka Sorkar halor ka jingleh bha ïa ki jingdawa, ka Seng ka la pynkup burom ïa u Myntri Rangbah bad kumjuh ïa u Symbud Myntri Rangbah bad ïa ki nongïalam ka seng kiba la trei shitom met bad mynsiem ban pynïaid beit pynïaid ryntih ïa ki kam ba bha jong ka seng.
U Myntri Rangbah u la pynkup burom ruh ia u samla uba wan na ka longiing jong ki Muster Roll uba wan ha ka kyrdan kaba shakhmat ha ka eksamin SSLC mynta u snem.
U Adviser jong ka seng u Bah Khroo. L. Pariat u la kyrpad hakhmat u Myntri Rangbah ba un ïarap ïa ki khun jong ki nongtrei bylla sngi ba ka Sorkar kan pynïoh lem ïa ka bhah kumba 10 percent ha ka rukom tungkam thungjam bad ka bhah pule puthi.
U la kyntu ruh ia ka Sorkar kan ai jingïada ïa ki wah kiba doh hapoh ka Ri-Lum Jaiñtia kum ka wah Kupli, Myntdu, Myntang bad ka Myngngot khang ba yn ïoh ïa ka umbam kaba khuid ba suba. La pynshong kun ïa kane ka sngi da ki jingrwai bad ki jingshad tynrai.
