Shillong, Nailar 16: Ka Khun Hynñiewtrep National Awakening Movement (KHNAM) ka la rai ban ïakhih da kaba pynlong ïa ka jingiashong kyllaiñ myngor ha ka 19 tarik Nailar ha Madan Malki ban pynbor ïa ka Sorkar ba kan pynduh noh ïa ka Personal Interview ha ka thep kam Group B,C,D.
Haba pynbna ïa kane sha ki lad pathai khubor u Working President ka KHNAM, Bah Thomas Passah ula ong ba kane ka jingdawa ka dei ha ka ban pynthikna ba ka rukom thungkam thungjam hapoh ki tnat Sorkar kan long kaba khuid ba suba.
U Bah Thomas ula ong ba kane ka jingdawa pynduh ïa ka Personal Interview ka dei ruh ban pynduh pyndam ïa ka jingïathungkam tuh tang ïa ki bahaïing hasem ne kiba don jingïadei bad ki heh Sorkar kaba la kynrei bha ha kine ki por.
“Ka KHNAM ka ïawer ïa baroh kiba sngewkhia halor kane naduh ki sengbhalang, ki samla wad kam bad ki kmie ki kpa ban wan kyrshan ïa ka KHNAM ha ka jingïakhih ban pynbor ïa ka Sorkar ha kaba ïadei bad kane ka kam,” ula ong.
U Bah Thomas ula ong ba naduh u snem 2016, ka Sorkar Pdeng ka la dep ban pynmih da ka jingpyntip (Notification) ban pynduh ïa ka Personal Interview na ka bynta ki kam Group B,C,D.
Shuh shuh na ka liang jong u, ula ïathuh ba 23 tylli ki Jylla hapoh ka Ri India kila pyntreikam ïa ka jingpynbna ba la pynmih da ka Sorkar Pdeng hynrei ha Meghalaya, haduh mynta kam pat shim ïa ki sienjam ban bud ïa ka jingbthah (Notification) jong ka Sorkar Pdeng.
