Shillong, Nailur, 11: Ka Hynñiewtrep Youths’ Council-Central Executive Council (HYC-CEC) ka la pynpaw ïa ka jingsngewkhia halor ka kaiphod ba dang shen ba la pyllait da u Comptroller and Auditor General of India (CAG) ha kaba ïadei bad Audit Report jong ka Pla Tyngka ka Jylla kaba maham ba ka Jylla kan ngat ha ka liewlep ka jingdap ram.
Ha ka shithi ba la phah sha u Myntri Rangbah ka Jylla u Conrad K. Sangma ha ka sngi Balang, u President ka HYC Bah Roy Kupar Synrem u la ong ba ka Sorkar ka dei ban ai jubab ïa ki katto katne ki jingkylli.
“Kum ki nongshong shnong jong ka jylla ngi don hapdeng ka jingsah umdum kaba khraw, la ngin ngeit ïa ki ktien jong u Myntri Rangbah ba kum ka jylla ngin sa lah ban kynjoh ïa ka thong 10 Billion Dollars Economy shwa u snem 2028 lane la ka pla tyngka jong ka jylla jong ngi ka la nang troiñ ban tip ba ka Jylla ka don ha ka liewlep ban dap ram haduh T. 15,000 klur,” u la ong.
“Watla u Myntri Rangbah ka Jylla bad ki ophisar jong ka tnat Pla Tyngka ki kyntait war ïa ka kaiphod CAG bad na ka jingpeit bniah ka jylla jong ngi kan ngat ha ka liewlep ba dap ram,” ong u Bah Synrem bad bynrap, “hynrei kum ki kynhun ka jylla, ngi kwah ba ka Sorkar Jylla bad ki ophisar kin ai jubab ïa ki katto katne ki jingkylli.”
U la ong, kaba nyngkong, la tip paidbah ba ka ram kam dei ka shu ïohei (grant) bad ym baroh ki ram ba la shim da ka Sorkar ki long ha ka dur jong ka Grant, kumba la pyrshang ban pynshai da u Myntri Rangbah ka Jylla ban ïada ïa ngi na ka jingshep tieng ba bunsien ki ram ba la shim da ka Sorkar Jylla ki long ki ram bym donkam siew sut na ka bynta 50 snem.
“Ka kaiphod CAG ka ong ba ki ram ba la shim da ka Meghalaya ki kynthup ïa ki ram iew (market loan) ba T.11,285.50 klur, ki ram na ki shlem ai ram ba T.1,349.04 klur bad T.2,002.58 klur ki ram bad ki jingsiew boina lypa na ka Sorkar India. Hato kam dei ka jingshisha ban siew biang ïa ka ram, ryngkat ne khlem ka sut? Bad lada jia ba kum kine ki ram yn ym lah ban siew biang hapoh ka por ba la buh, te kaei ka ban mih na kata?” la buh jingkylli u Bah Synrem.
Ka jingkylli kaba ar, u Bah u la ong, ïa ka ram yn ym lah ban shim khlem ka jingpynskhem.
“Mynta, ki mih ki jingkylli, kiei ki jingpynskhem ba la ai pyrshah ïa kine ki ram? Na ka bynta kaei la shim ïa kine ki ram? Bad kum ki nongshong shnong jong ka Jylla ngi donhok ban tip ruh kumno ki ram ki la kot haduh katne?”
“Kaba lai, kum ka sakhi ha kine ki snem ba ladep, ka Sorkar Jylla ka la pyndonkam ïa ka pisa paidbah na ka bynta ki prokram ki bym seisoh kum ki tamasa bad ki bym shym la pynmih khajna eiei ïa ka Jylla.”
Ka Sorkar Jylla ka la pyndonkam ïa ka pisa paidbah ha kiba bun ki kam bym shoh ler kum ha kaba thungkam ïa kiba bun ki riewsaiñ pyrthei, ki consultant bad kiwei kiwei. Shuh shuh, ngi sakhi ruh ïa ka jingkiew ka dor jong kiba bun ki projek kum ka Saubhagya Scheme, ka jingshna ïa ka Meghalaya Legislative Assembly Building bad kiwei kiwei.
“Lada ïa ka pisa ba la shim ha ka dur jong ka ram la pyndonkam da ka Sorkar na ka bynta kine ki prokram bym shoh ler bad kiwei kiwei ki kam, na ka jingsiew tulop ïa ki riewsaiñ pyrthei ba la thung kam bad ka jingkiewdor jong ki projek, kumno ka Sorkar kan pynksan ïa kine? la buh jingkylli u Bah Synrem.
U Bah Synrem ka jingkylli kaba saw u la ong, la lap da ka CAG ba ka Sorkar Jylla kam shym la lah ban ïoh biang ïa ka pisa paidbah ha ka dur jong ki khajna ba bunjait na ki briew bad na ki kynhun bapher bapher kiba dei ban siew ïa kum kine ki khajna, bad kiwei kiwei. Ngi ïohi ruh ba ka Sorkar ka la pyllait ei ïa ki khajna sha ki katto katne ki riewshimet bad ki kompeni kum ka VAT na ki trai Petrol Pump, ki Bill thang bording jong ki karkhana bad kiwei kiwei. Ha kawei ka jingjia kaba kyrpang jong ka Jylla, ka Sorkar ka shim bun ki ram hynrei ka dang sbun mynsiem ban map ei ïa ki kompeni bad kattno katne ngut ki riewshimet. Kaei ka ban jia ha kaba ïadei bad ka jingbym lah shuh ban siew ïa ki ram ba la shim?
“Kaba san, lah ban ïohi na ki kaiphod CAG ba manla u snem ba ki don ki Public Undertakings bad ki Corporations kiba la kylla long kum ki ‘hati lieh’ na ka bynta ka Jylla bad dei ban pynbeit mardor da ka Sorkar Jylla. Ka jingsngewkhia jong ngi ka long, kumno lada kine ki “shlem treikam hati lieh” ki treikam da ka pisa ba la shim kum ka ram? Hato ka Sorkar Jylla kan lah neem ban siew ïa ki ram haba kine ki shlem ki treikam ha ka jingduhnong?” u la ong.
“Kaba khatduh eh, ki paralok jong ngi ha rilum Garo Hills ki la pynjam ïa ka sur jingdawa jylla Garoland. Ha kum kane ka khep, lada ïa ka Jylla yn phiah ha ki ar tylli ki Jylla ha ki snem ban sa wan, hato kam dei ka jingkitkhlieh jong ka Jylla kmie ban siew biang ïa ki ram ba la shim? Hato kam dei ka jingshisha ba ki nongshong shnong jong ka Khasi-Jaiñtia, lane da kano kano ka kyrteng, namar ba ka long ka Jylla Kmie ha kata ka por, kin kitkhlieh ban siew ïa kano kano ka ram ba la shim da ka Jylla jong ka Meghalaya?’ la buh jingkylli shuh shuh u Bah Synrem.
