Shillong, Nailur 01: Ka Hynñiewtrep Integrated Territorial Organisation (HITO) ha ka sngi thohdieng ka la dawa ïa ka Khasi Hills Autonomous District ban bishar bad ban pynduh noh ïa ki Trading Licenses jong ki bar jylla kiba la ïoh No objection Certificate (NOC) na ka R&R Colony Welfare Society, Rynjah.
Ki nongïalam jong ka HITO ha ka jingïakynduh ïa u Chief Executive Member (CEM) ka KHADC u Bah Pynïaid Sing Syiem ka la pan jingpynshai ruh halor ka jingai NoC da ka R&R Colony Welfare Society sha ki bar jylla ban ïoh ïa ka Trading License na ka bynta ban seng dukan ha ki bynta bapher bapher jong u pud u sam ka shnong Rynjah.
Ha ka jingïakren bad ki lad pathai khubor, u President ka HITO u Bah Donbok Dkhar u la ïathuh ba ka seng ka la ïoh jingtip ba ki don shibun ki bar jylla kiba la ïoh Trading License na ka R&R Colony Welfare Society.
U la ïathuh ba ha u snem 2007, ka R&R Colony Welfare Society ka la pynmih ïa ka Resolution ba la soi lang da u MLA u Bah A.L Hek bad u MDC Bah Sanbor Shullai bad kane ka Resolution ka aibor ïa ka Society ban ai NoC ïa ki briew kiba sah ha kane ka Colony na ka bynta ban ïoh ïa ka Trading License.
“Ka R&R Colony ka hap hapoh ka jingpeit jong ka Dorbar Shnong Rynjah ba la pynkupbor da ka Hima Mylliem bad dei namar kane ka jingai NoC da ka R&R Colony Welfare Society ka long kaba be-aiñ bad ka long pyrshah ïa ka Mylliem Act 2007 and Rules 2015 ba la mynjur da ka KHADC,” la ong u Bah Donbok.
U la ïathuh ba ha ka jingïalang, ka Seng ka la dawa ïa u CEM ban thung ïa ka jingtohkit kaba bniah da kaba khot hajir ïa ka Dorbar Shnong Rynjah ba kan pynshai kumno kane ka Society ka ïohbor ban ai NoC ïa ki briew kiba sah hapoh ka RR Colony.
“U CEM u la ïaroh ïa ki sienjam ba ka HITO ka la shim bad shen ka Executive Committee jong ka District Council kan sa pynmih ïa ka jingpynbna ba ïa ka NoC yn lah ban ai tang da ka Dorbar Shnong jong ka Rynjah, ym da ka Society,” ong u Bah Donbok haba jubab ïa ka jingkylli ki lad pathai khubor.
