Shillong, Nailur 01: Ka Khasi Hills Autonomous District Council (KHADC) ha ka sngi thohdieng ka la byrngem ban khang khyrdep ïa ki Bank bad ki shlem kynshew pisa, lada kim lah ban ai jingithuh ïa ki dulir khyndew ba la ai da ka Council katkum ka KHAD (Regulation and Administration of Land) Act, 2021.
Ïa kane ka rai la shim ha ka jingïalang ba la khot pynlong da u Chief Executive Member (CEM) ka KHADC u Bah Pynïaid Sing Syiem bad ki nongmihkhmat na ki Bank bapher bapher bad ki Bank shimet kiba treikam hapoh u pud u sam jong ka Council.
Kane la jia hadien ba ka KHADC ka la ïoh pdiang ïa kiba bun ki ujor na ki riewpaidbah kiba la kynnoh ba ki Bank bad ki shlem kynshew pisa ki la kyntait ïa ki aplikeshon shim ram pisa tang namarba ki kyntait ban ithuh ïa ki dulir khyndew ba la ai da ka Council katkum ba la pynkupbor da katei ka Aiñ, ba la ai jingmynjur ruh da u Lat ka Jylla.
Ha ka jingïakren bad ki lad pathai khubor, u Bah Pynïaid Sing Syiem u la ong, ba la bthah ïa u Deputy Secretary in-charge Land ban pynmih noh mardor ïa ka “Circular” ne ka jingpyntip bad ban ai kopi ruh ïa ka KHAD (Regulation and Administration of Land) Act, 2021 sha baroh ki Bank bad ki shlem kynshew pisa khnang ba kin bud ïa ki jingbthah nangne shakhmat.
“Ngi la kren da kaba shai ha ka jingïalang hadien ba la pynmih ïa ka “Circular” shaphang ka Aiñ, lada kano kano ka Bank ka dang ïai bteng ban kyntait ïa ka Loan Application ban ym ithuh ïa ki dulir khyndew ba la ai da ka Council, ngin sa leh ïa kaba donkam katkum ka Non-Tribal Regulation Act, bad ban khang khyrdep syndon kum ïa kita ki Bank,” u la ong.
U Bah Syiem ula ïathuh ba kane ka aiñ ka la kren shai ba ki dulir khyndew ba la ai da ka Council dei ban ai jingithuh da kino kino ki bor kynthup ruh ïa ki Bank bad ki shlem kynshew pisa jong ki riewshimet.
U la ong ba u Land Recording Officer u dei uba la pynkupbor ban ai ïa ka No Objection Certificte na ka bynta ka Mortgage and Land Valuation Certificate bad ïa ka Non-encumbrance Certificate. “Namarkata, kumba la pynkupbor da ka aiñ, ngin ym ailad ïa ki Bank ba ki kyntait ïa ki Loan Applications jong ki briew jong ngi,” u la bynrap.
Katkum ka jingong jong u, kane ka Aiñ ka la long ruh ka jingkyrkhu ïa ki paidbah khamtam ïa kito kiba kwah ban pynskhem ïa ka jinglong trai halor ka khyndew ka shyiap lajong. Ka KHADC ka la wanrah ruh la ki jong ki dor na ka bynta ka jingrejistar ïa ki jaka.
