Shillong, Nailar, 03: Ka Hynñiewtrep Integrated Territorial Organisation (HITO), West Jaiñtia Hills District ha ka sngi baar hapoh ka jingialam jong u President u Bah Wanbiang Pulang ka la ujor ha u Deputy Commissioner jong ka West Jaiñtia Hills u Bah BS Sohliya bad ban dawa ruh ba dei ban khang khyrdep ia ka iew die Masi bad Muid ha ka shnong Mookyndur.
Ka seng hadien ba ka la wad bniah ia ka jingmih kynsan jong kane ka iew kaba pynpoi ia ki Masi bad ki Muid nabar ka jylla ka la lap ba ki nongpyniaid ki shu leh mynleh ban pynbiang ia ki kot ki sla hynrei katkum ka jinglap jong ka seng kane ka iew die Masi bad Muid ka long kaba be-ain namarba ym don satia ki doktor kiba pynshisha ba ki Masi bad ki Muid kiba wan nabar ki dei kiba la ioh injek tika.
Ka seng ka la kam ba ka la ioh jingtip ba ia kine ki Masi bad ki Muid la shalan sha ka ri Bangladesh khlem ki kot ki sla bad ha kajuh ka por ka la kynnoh ba u trai jong ka iew u la pynkheiñ ruh ia ka rule 47 haduh 56 jong ka Animals Transport Rules 1978.
Ha kaba iadei bad kane ka seng ka la phah ruh ia ka kopi jingujor sha ka tnad Pulit, sha ka tnad Veterinary, sha ka Land Custom, sha ki shipai Boder security Forces bad sha u Chairman jong ka Animals Welfare Board of India, New Delhi ban leh ia kaba donkam katkum ki kyndon ain.
Shuh shuh na ka liang jong ka seng ka la iathuh, ba ki paidbah ki ju ujor manla ka por ia ka jingbret pathar ia ki Masi bad ki Muid kiba la iap ka kynrei bha bad ki nongri jingri kiba don marjan bad katei ka iew kim sngew shngain shuh namar ka jingdon jong kane iew kat haduh ba ka la pynartatien ia kiba bun balang.
