Shillong, Nailar 08 : Ka Hynñiewtrep Youths Council, Central Body ha ka 8 tarik u Nailar, 2023 ka la aiti da ka jingthoh ha u Myntri ka tnat Pule Puthi jong ka sorkar Jylla u Rakkam A. Sangma ban dawa ia ka sorkar ba ka dei ban plie ruh ia ka Shillong Campus ynda la pynsdang ia ka Captain Willamson A. Sangma University ha Tura, West Garo Hills District.
Ha ka jingiakren bad ki lad pathai khubor, u President ka Seng u Bah RobertJune Kharjahrin u la iathuh ba ka seng ka la pynsngew ruh ha u Myntri halor ka jingrem shaba palat ka bai skul hapdeng ki skul ba la pyniaid da ki riewshimet ne ki Private School bad ki skul kiba ioh jingkyrshan pisa na ka sorkar.
Shuh shuh u la iathuh ruh ba ka Seng ka la dawa ruh ia ka sorkar ban buh noh ia ki jaka thoh eksamin Central University Entrance Test ha manla ki district jong ka jylla bad ba ka Sorkar ka dei ruh ban ai jingkyrshan pisa ia ki Kolej na ka bynta ban pyntrekam ia ka National Education Policy 2020.
Ha kane kajuh ka sngi, ki nongialam jong ka HYC Ribhoi Sepngi Circle ruh ki la aiti ia ka dorkhas ha u Myntri ka tnat Pule Puthi halor ka jingdawa ban pyntreikam noh ia ka Patharkhmah Model Degree College.
