Shillong, Nailur 11 : Ki nongialam jong ka Jaiñtia Students Union (JSU) ha ka jingiakynduh ia ka Myntri ka Koit ka Khiah ka Dr. Ampareen Lyngdoh ha ka lah sngi U Blei ka la dawa ba ka Sorkar kam dei satia ban ailad ia u Ayush Kumar ban ioh pule MBBS na ka bhah pule jong ka Jylla ha ka open Category.
Ha u kyrwoh ba la phah sha ki lad pathai khubor, ka JSU seng kmie bad ka JSU Khliehriat Circle ryngkat lang bad ki nongialam jong ka shnong Thangskai ki la iakynduh ia ka Dr. Ampareen Lyngdoh bad aiti ruh da ka shithi ujor ia ka Sorkar halor ka jingpynrung kyrteng ia u Ayush Kumar ha ka thup pule MBBS.
Na ka liang jong ka Myntri ka la ong ba ka Sorkar ka pdiang ia ki kot ki sla kaba la phah na ka Ophis u Deputy Commisioner ka East Jaiñtia Hills District bad la shem ba u Ayush Kumar u la ai da ka Permanent Residential Certificate (PRC) kaba u la ioh na ka ophis u Deputy Commisioner ka East Jaiñtia Hills District ha u snem 2021 bad ka Myntri ka la ong ruh dei ban pan jingshai ban ujor ha u Deputy Commisioner jong ka East Jaiñtia Hills District halor ka jingai Permanent Residential Certificate (PRC) ia une u bar jylla.
Ka seng ka la dawa na ka Sorkar ba da leilei ym dei ban ailad ia u Ayush Kumar ban leit pule MBBS namarba katkum ka jingtip ba um dei satia u nongshong shnong jong ka shnong Thangskai bad ka seng ryngkat lang bad ki nongialam shnong kin sa leit ban kynduh ia u Deputy Commisioner ka East Jaiñtia Hills District ban tih bniah halor ki kot ki sla jong u Ayush Kumar bad lada shem shisha ba une u bar jylla u leh thok ka seng kan ym ailad ia u bad na ka liang ka Sorkar ka dei ban pynduh shi syndon ia ka seat MBBS ia u.
Ka seng ka phah ruh ia u kyrwoh uba shai sha baroh ki nongialam shnong jong ka rilum Jaintia bad sha baroh ki nongialam shnong ka Bri u Hynniewtrep ba kim dei shuh ban ai syrnot lane kino kino ki No Objection Certificate ia ki bar jylla khlem da tih bniah la kine kiba pan syrnot ki dei hok ne em ban ioh ia ki kot na ki Dorbar Shnong.
