Shilong, Nailur, 12: Ka Khun Hynñiewtrep National Awakening Movement (KHNAM) Central Executive Council (CEC) ha ka sngi baar ka la ujor sha u Chief Executive Member (CEM) jong ka Khasi Hills Autonomous District Council (KHADC) u Bah Pyniaid Sing Syiem ba un tuklar halor ka jingtreikam jong ka Shillong Golf Club khlem ka Trade License.
“Na ka liang ka seng ngi pynpaw ia ka jingpyrshah kaba jur halor ka jingtreikam jong ka Shillong Golf Club khlem ka Trade License. Kumba la paw paidbah ba kane ka Club ka la sdang ruh ban lum ia ka bai rung (entry fee) na ki paidbah bad haba ka la don ka jinglum pisa na ki paidbah ngi sngewthuh shai ba kane ka ladei ka khaïi. Katkum ki aiñ jong ka Council kane ka Club ka ladei ban don ia ka Trade License bad ki dkhot lane ki nongtrei jong kane ka Club ki dei ban siew ruh ia ka Professional Tax sha ka Council,” ong ka KHNAM ha ka dorkhas ba la soi da u Working President u Bah Thomas Passah bad u General Secretary u Bah James M.A Neng.
“Ngi pynpaw ruh ia ka jingsngewlyngoh ba la aiwai ia kane ka jaka sha kane ka Club naduh u snem 1926 bad la aiwai ruh khlem buh por kaba lah ban wanrah pat ka jingsynjor ka jong long trai u Khasi halor ka khyndew Khasi. Ngi kyntu ia ka Council, kum ka nongbat ia ka khyndew ka shyiap ban tuklar lem ia kane ka kam,” ong ka dorkhas
“Kan long kaba kham sngewtynnad bad ai mynsiem ba ia kane ka Club ladei ban pyniaid da ki Khasi suda lane ban seng da ki Self Help Group (SHG) lyngba ki lai Dorbar Shnong kiba don sawdong kane ka jaka khnang ba kan plie lad ia ki samla ki jong ngi kiba iai tyrha na ka jingkyrduh kam,” la bynrap ka dorkhas.
“Lada ngi bud ryntih ia ki dkhot (section) jong ka Trading by Non-Tribal Regulation 1954 ka Section 3A sub section kaba (a) haduh (f) bad kiwei kiwei ruh ki kyndon kiba la don lypa ha kane ka Regulation ngi la sngewthuh ba ym lah shuh ban ai laisen wat lada ki aplai ruh. Ngi kyntu ia phi ban sngewbha ban tuklar ia kane ka kam khnang ba ngin lah ban khanglad ia ka jingpynkheiñ aiñ ki bar jylla bad ruh ia ka jinglait ei jong ka pisa ka Council,” ong shuh shuh ka dorkhas.
