Shillong, Nailur 12: U Myntri Rangbah ka Jylla u Conrad K. Sangma la maham ba ki College kiba la ïoh jingithuh na ka skulbah North Eastern Hill University (NEHU) ki lah ban shah ktah lada kim lah ban pyntreikam noh ïa ka National Education Policy (NEP) 2020.
“Ka jingrejistar ne ka jingïoh jingithuh na ka Central University ka lah ban shah ktah. Kine ki jingshah ktah kin don beit hynrei kin ym jia noh mynta mynta, kam dei ka jingpyntieng kohtympan hynrei nga sngew ba hadien 4-5 snem haba ki leit ban pynthymmai ka jingïoh jingithuh, nga thikna ba kane ka kyndon kan wan jia bad ka jingkylli ruh kan sa mih ha kata ka por, ong u Sangma ha ka jingïakren bad ki lad pathai khubor ha ka sngi baar.
Kane ka jingmaham jong u Myntri Rangbah ka long hadien shi sngi ba ki nonghikai jong ki 22 tylli ki College kiba don hapoh ka shatri jong ka Meghalaya College Teachers’ Association (MCTA) ki la rai ban ym weng ïa ka Non-Cooperation Movement (NCM) kaba dang bteng haduh mynta pyrshah ïa ka jingkyntait jong u Vice Chancellor jong ka skulbah NEHU ban weng noh ïa ka Jingpynbna (Notification) ba la pynmih ha ka 12 tarik Naitung 2023, kaba kyntu ïa ki College ba la ïoh jingithuh da ka NEHU ki dei ban pyntreikam noh mardor ïa ka NEP naduh ka Academic Year jong une u snem 2023.
U Myntri Rangbah u la kyntait ban kynthoh eiei halor kane kam da kaba aidaw ba um don ïa ki jingtip kiba bniah bad u ha kane ka khyllipmat.
Da kaba pynpaw ba ka Jylla ka la ïaid shakhmat ban pyntreikam ïa ka NEP, u Sangma u la ong, “yn ym lah shuh ban phaidien halor kane.”
U la kyntu ïa ki nonghikai bad ïa ki College ba kin wan shakhmat ban ïathir ïatai sani halor kane ka mat bad ka Sorkar Jylla.
“Ngi lah ban ïakren ïa ki jingeh kiba phi don, lehse ki jingeh ba phi ïohi kin dei tang ki jingeh kiba donkam ban pynshai ne donkam ka jingïasyllok lang. Ki don katto katne ki jingbym ïasngewthuh jingmut hynrei ngin hap ban pynshai ïa kita,” u la bynrap.
U Myntri Rangbah u la ong ba ka Sorkar ka long kaba kloi ban ïakren bad ka MCTA halor ka jingsngew jong ki.
“Sa shisien nga pdiang sngewbha ïa ki. U Myntri ka tnat Pule Puthi jong ngi, u long uba kloi ban ïakynduh lada donkam. Nga ruh nga long uba kloi ha kano kano ka por lada phi donkam ïa ka jingpynshai. Ngi don hangne ban pynshai,” u la bynrap.
Shuh shuh u Sangma u la ong ba u ladep ïakren bad kiba bun ki Principal bad bun na ki, ki la pynpaw ba ki kwah ban ïaid shakhmat ban pyntreikam ïa ka NEP bad ka Sorakr ka la kular ruh ban kren ïa ki lad jingïarap lada donkam.
Ha kajuh ka por, u Myntri Rangbah u la ong ba kam don satia kano kano ka jingbei pisa na ka Sorkar Pdeng ha kaba ïadei bad ka jingpyntreikam ïa ka NEP.
“Ka Sorkar ka lah ban ïarap ïa ngi ha kiba bun ki rukom (hynrei) kam don kano kano ka kyndon kaba kdew shai na ka Sorkar ban ong ba ngin ai katne ka pisa ban pyntreikam ïa ka NEP,” u la ong.
Katkum ka jingong jong u, ka Sorkar Pdeng ka la ïarap ïa baroh ki jylla la ka long ha kaba shna ïa ki kamra klas ha ki College bapher bapher, la ka long ban ai jinghikai bad kiwei kiwei.
