Shillong, Jymmang 31: Ki nongialam jong ka Khasi Students Union (KSU) South West Khasi Hills District Unit ha ka sngi palei ki la iakynduh ia ka Director of Health Services (MI) ka Dr. F.V. Kharshiing ban iakren halor ki mat kiba iadei bad ka koit ka khiah ha South West Khasi Hills District bad hapoh ka Mawsynram C&RD Block, East Khasi Hills District.
Ha kajuh ka por ka seng hapoh ka jingialam jong u President u samla Forwardman Nongrem ka la banjur hakhhmat ka DHS (MI) ha kaba iadei bad ka jingthungkam Contractual palat 50 ngut hapoh ka Civil Hospital Mawkyrwat khlem da khot ia ka Advertisement hashwa ban thep ha ki post bapher bapher.
Ka KSU lyngba ka jingthoh ba la aiti ha ka Director ka la pynpaw ia ka jingsngewkhia kabajur halor kane ka thungkam thungjam khlem da iaid ia ki kyndon ba la buh ha kaba ka la pynduh jingshaniah ia ki samla thepkam thepjam napoh ka District.
Ka seng ka la dawa na ka Director ba ka dei ban shimkhia bad pynbeit halor kane ka mat thungkam thungjam hashwa ba ka seng kan shim da kiwei pat ki sienjam .
“Ngi kyntu ia ka ophis ba ka dei ban pynbeit halor kane ka bynta da kaba pyllait ia ka Advertisement bad khot Interview khnang ba ki samla kin ioh ia ka lad ban iakhun ia ka interview. Ngi kyntu ruh ia ka Sorkar ba ka dei ban phah noh ia baroh ki post sha ka DSC ne MPSC ym ban buhrieh ia ki ha kane ka Civil Hospital khnang ba ka DSC ne ka MPSC kin ioh ban pyllait ia ka Advertisement bad ban khot ia ka interview khnang ba ki samla kiba dei hok ban iohkam kin ioh rung kum ki nongtrei hapoh ka Civil Hospital,” la ong ka seng.
Na ka liang jong ka Director of Health Services (MI) ka la kular ba kan bthah ia u District Medical and Health Officer (DM&HO) South West Khasi Hills District ban ai jingtip ia baroh ki Post kiba lait hapoh ka Civil Hospital Mawkyrwat sha ka DSC ne MPSC khnang ba kin ioh pynbna noh mardor ia ka Advertisement bad ban pyndam noh ia ki nongtrei kiba rung na kyrpong ing.
Ka seng ka pynsngew ruh hakhmat ka Director ban pynbha bad maramot ia ka Mawsynram PHC, ban shna kham stet ia ka Jyllep bad Mawhiang Sub Centre ia kaba la phah ban ai jingmynjur na ka bynta ban mang pisa lyngba ka PMABHIM, ban kyntiew ia ka Ranikor CHC sha ka First Referral Unit (FRU) CHC da kaba pynbiang ruh ia u Pharmacist ba thikna bad ka X-ray Machine hapoh kane ka CHC bad ban pynsted ha kaba iadei bad ka Pediatric Ward hapoh ka Civil Hospital Mawkyrwat.
