Shillong, Jymmang 31: U Deputy Commissioner jong ka East Khasi Hills u S.C Sadhu uba dei ruh u Returning Officer (R) jong ka Shillong Parliamentary Seat ha ka sngi Thohdieng u la lum jingialang ia ki nongialam jong ki seng sainpyrthei ka jylla ban iakren ha kaba iadei ka jingpynkhreh ia ka sngi ñiew Vote ka ban long ha ka 4 tarik u Jylliew, 2024
Ki seng saiñpyrthei kiba iashim bynta ha ka jingialang ki long ka National People’s Party (NPP), ka Voice of the People’s Party (VPP), ka United Democratic Party (UDP, ka Indian National Congress bad kiwei kiwei.
Haka jingiakren bad ki lad pathai khubor hadien ba la wai ka jingialang, u MLA jong ka VPP na Mawlai constituency u Bah Brighstarwell Marbaniang u la iathuh hadien ka jingkyrpad jong ki seng saiñpyrthei na ka liang jong u Deputy Commissioner (DC) u la mynjur ban pynjari ia ka Section 144 CrPC tang ha ka jaka niew Vote, kata, ha Polo bad ha ki jaka marjan hynrei ym ha baroh kawei ka East Khasi Hills District.
U la ong ba u Deputy Commissioner u la pdiang ia ka jingkyrpad jong ka VPP ban weng ia ka mat kaba san jong ka Section 144 CrPC kaba khang ban mih bad ban iaid paidbah ha ka sngi niew vote hapoh ka East Khasi Hills District.
“Ka long kaei kaei kaba sngewtynnad ba u Deputy Commisioner u la mynjur ba ka jingpyntreikam ia ka Section 144 CrPC kan treikam tang ha jaka niew votes bad ha ki jaka marjan,” u la ong.
U la iathuh ruh ba u DC u la pyntip ba un sa pynmih biang ia ka jingpynbna paidbah la kumno kumno ha ka Lah Sngi u Blei jong ka taiew ban sa wan.
“Ngi kyrpad ia ki paidbah haba ki mih, ki dei ban long kiba jaijai namarba ioh ka pynthud ia ka shongsuk shongshngaiñ bad ban long kiba donakor,” la kyrpad u MLA jong ka VPP.
U Working President ka NPP u Prof. Don War uba mihkhmat ia ka NPP u la iathuh ba ka jingialang bad u Returning Officer ka long ban pynsngew ia ka jingpyrshah jong ki seng saiñpyrthei ban pynjari ia ka Section 144 CrPC ha ka sngi ñiew vote kaba khang ban iaid paidbah.
U la iathuh ba baroh ki sengsain pyrthei ba kynthup naduh ki nongmihkhmat ia ki kyrtong shimet ki la pynsngew ha u Returning Officer ba kam iahap satia ban pynjari ia ka Section 144 CrPC ha baroh kawei ka East Khasi Hills.
“Ngi la pynsngew ha u DC ba ka sngewiahap ban pynjari ia ka Section 144 CrPC ha ka jaka niew vote ha Polo hynrei kam iahap pat ban pynjari ia ka hukum ha baroh kawei ka District,” u la bynrap.
U la iathuh shuh shuh ba u DC u la pan na ki seng saiñpyrthei lada u/ka kyrtong jong ki seng kiba jop na kaei ka lynti ki iaid ha kato ka sngi.
