Shillong, Nailar, 29: Ka Thma u Rangli Juki (TUR) ka la dawa ïa ka Sorkar Jylla ban dei ban wanrah shwa ha ki lympung bad ki rynsan paidbah ïa ki aiñ ne ki polisi hashuwa ban thaw bad mynjur ïa ki khnnag ba ki paidbah nongshong shnong bad kumjuh ruh ki Autonomous District Council, ki Dorbar Shnong ki dei ban ïoh bynta ha kaba pynwandur ïa ki aiñ.
Kane ka jingdawa jong ka TUR ka long hadien ba ka Meghalaya State Council on Climate Change and Sustainable Development kaba la khlieh da u Myntri Rangbah ka Jylla, u Conrad Sangma, ka la khmih biang ïa ka mat “Meghalaya Climate Emergency and Green Growth Framework” lane ka jingdawa jong ka por ban ïada ïa ka mariang bad ban thaw ïa ki polisi ban pynneh ïa ka mei mariang ryngkat bad ki kam pynroi. Ka kamram kaba hakhmat eh ka long ban tehlakam ïa ka jingpynjot ne jingjot jong ka mariang bad lah ban sngewthuh ba ka la don ruh ka jingtyrwa ban thaw ïa ka aiñ kaba tip kum ka Meghalaya Climate Emergency Law.
Ha u kyrwoh ba la phah da ka Convenor ka Kong Angela Rngad, ka TUR ka la dawa ba dei ban pyntreikam pura ïa ki aiñ ïada mariang bad dei ban pyntreikam pyrkhing ïa ki kyndon jong kine ki aiñ. Ban ai jingtip sha ki paidbah ïa baroh ki project ïada mariang bad ruh ka jinglut jingsep ba la pynlut halor kine ki project haduh mynta.
“Niuma kane ka khubor ka pynkyndit bad ka kdew ïa ka jingleh sop sop bad ka jingleh bym suidñiew jong ka Sorkar khlem da kynjoh ktien ïa ki nongshong shnong ha shuwa ban thaw ïa ka Aiñ ïada bad pynneh mariang. Kynmaw ba ïa ki kam pynneh bad ïada mariang yn ym lah ban shu pruid na ki shuki syiad ha Secreteriat lymne thaw tang da kita ki consultant khlem da hiar khyndew bad sngewthuh ïa ka jinglong jingman jong ka jaka bad ïasyllok bad nongshong shnong ka Jylla kiba la ïoh pateng ïa ka jingstad na ki longshuwa ha kaba ïadei bad ka jingtip shaphang ka mariang,” la kynthoh ka TUR.
Ka Thma u Rangli (TUR) ka sngewkhia halor kane ka jingleh sopsop jong ka Sorkar Jylla bad ka jingshim kabu jong ka Sorkar da kaba pyndonkam bakla ïa ka kyrteng jong ka jingïakhun ban ïada ïa ka mariang na ka jingjot, pynban ka Sorkar MDA ka rieh tngen bad buhrieh ïa ki kam be-aiñ bad ki kam pynjot mariang jong ka. Ka jingma kaba khraw kaba ap ïa ka Jylla Meghalaya mynta ka long ka jingtih-jingkhlong bad jingkhaïi be-aiñ ïa u dewiong, ka jingpom pathar ïa ki dieng bad jingpynjot ïa ki khlaw, ki um ki wah da kaba tih maw, khat shyiap be-aiñ bad khlem bud ïa ki kyndon jong ki aiñ pynneh mariang. Nalor nangta ka jingpynkylla ri kynti ïa ki ri raij bad jingpynduh ïa ki khlaw shnong, ki jaka shnong bad ki raij ha kylleng ka Jylla.
Haba buh jingkylli halor ka jingpynlut pisa ïa ka jingpynbna jong ka Sorkar ban thung 1.5 million ki tynrai dieng, ka TUR ka la ong, “halor kane ka jingpynbna jong u Myntri Rangbah ka Jylla ban thaw ïa ka Meghalaya Climate Emergency Law, ngi dei ruh ban pynkynmaw ba u juh u Myntri Rangbah ha ka snem 2019, ha ka por ba rakhe ïa ka World Environment Day, u la pynbna ban thung 1.5 million tylli ki tynrai dieng ha kylleng ka Jylla. Ka jingkylli ka mih ka la jia aiu ïa kita ki 1.5 million tylli ki tynrai dieng kiba la thung naduh u snem 2019? U Myntri Rangbah u dei ban jubab shuwa ïa kane ka jingkylli. Hangno u phah sumar bad katno ngut ki nongtrei ne mali la thung na ka bynta ban sumar ïa kine ki dieng? Katno la pynlut na ka pla tyngka jong ka Sorkar ha kaba ïadei bad kane ka jingthung dieng? Ka jingleh mynleh kan ym lah ban pynim pat ïa ka mariang kaba la jot rathai bad yn ym lah ban ïada ne pynneh ïa ka mariang da kine ki kam thamula. Kaba sngewsih ka long ba ka Sorkar Meghalaya ka khlem ïeng pyrshah ïa ka jingpynkylla (amendment) ïa ka Aiñ Forest Conservation Act, kaba ktah jur ïa ki tribal kiba dei ki nongshong shnong kiba nyngkong eh ha ka dewbah India bad kiba im ha ki khlaw ki btap, kiba im ja na ki khlaw bad kiba don la ka jong ka jingstad ban pynneh ïa ka mariang kaba ki la ïoh pateng.”
Kumjuh ruh ha ki por kiba kham mynshwa ka la don ruh ka jingpynbna bad ka jingmang tyngka kaba heh na ka liang ka Sorkar Meghalaya na ka bynta ban pynneh bad ïada ïa ki tyllong um. Kumta ki paidbah ki donkam ban tip kaei kaba mih na kane ka jingmang tyngka bad ka jingpynlut ha kane ka bynta, la bynrap ka TUR.
Kam don jingmut ban shu pyrta ba ka la don ka jingpynkhreh kumno ban ïakhun pyrshah ïa ka jingjot bad jingkylla jong ka mariang khlem da buh hakhmat ki paidbah nongshong shnong, kiba shah ktah jur na ka jingjot jong ka mariang, ïa kita ki lad ne ki rukom ne ki kyndon aiñ ban tem ïa ka jingma kiba mih na ka jingjot ka mariang. Ka long kaba kongsan ba ka Sorkar kan pynbna paidbah ïa kita ki polisi ne ki aiñ kiba ka thmu ban thaw namar kane kan ktah ruh ïa ki hok tynrai jong ngi kum ki trai muluk ha kaba ïadei bad ka khyndew ka shyiap, ka khlaw, ka um bad ka lyer kaba ngi ring bad pynhiar mynsiem. Ka Sorkar kam dei ruh ban ïuhroit ïa ki kyndon jong ka Sixth Schedule bad ïa ki Dorbar Shnong, Raij bad Hima ha ka nam jong ka jingpynneh mariang.
“Ngi dawa ba ka dei ban don ka jingkynjoh ktien bad ka jingïathir nia ha ki lympung paidbah ha shuwa ban thaw ïa kino kino ki aiñ kaba kynthup ïa ki aiñ ne policy ïada mariang. Kine ki aiñ ki dei ban long kiba khlaiñ ban tehlakam ïa ki kam be-aiñ bad jingtih be-aiñ ïa u dewiong, mawshun, mawthup bad shyiap. Ki dei ruh ban lah ban tehlakam ïa ka jingpynjot pathar ïa ki khlaw, ban ïada ïa ki tyllong um bad ki dei ban khanglad ïa ki ka jingshna pathar ïa ki parking lot khlem pyrkhat shuh, kat haba don ki jaka kiba lait la shu khohreh ban tei parking lot ne shopping mall, khlem pyrkhat kan jia aiu hadien habud. Donkam tang ar tylli kiei kiei na ka bynta ban weng ïa ka jingblok kali ha Nongbah Shillong bad ban pynkhuid-pynitynnad ïa ka Sor Shillong, kita ki long ban pynbun bad pynïaid thikna ïa ki kali paidbah kum ki bus bad kiwei bad ruh ban thaw ïa ka kynhun kaba skhem bad kaba khlaiñ ban pynïaid ïa ka Sor bad ka jinglum ïa ki ñiut ki ner na ki tyngkong ïng bad dukan jong ki briew, ïa kane lah ban leh da kaba ïatreilang bad pynkup bor ha ki Dorbar Shnong,” la ai jingmut ka TUR.
“La shem ba ka Meghalaya ka dei ka Jylla ka bym ju pyntreikam bha bad kaba ju pynkheiñ ïa ki aiñ kiba la don lypa kum ki aiñ Air and Water Acts bad ka Environment Impact Assessment Act,” la kynnoh ka TUR.
