Shillong, Jymmang, 30: Ka Anti Corruption League (ACL) ka la dawa na ka sorkar Meghalaya ba kan ithuh ïa ki Desi Muslim kiba shong basah ha ki them jong ka rilum Garo kum kita ki Other Backward Class (OBC) bad ki dawa ba ki dei ban ïoh ïa ka bhah kaba 4% ha ka ïoh kam ïoh jam. U General Secretary jong katei ka Seng u Kabir Mastopha u la phah da ka jingthoh sha u Myntri Rangbah ka jylla u Conrad K Sangma ban pynsngew ïa ka jingdawa jong ki.
Katei ka seng ka la pynpaw ba ka jingkyrshan ïa ka bhah ba la bynta na ka bynta ki Khasi, Jaiñtia bad Garo kumjuh ruh ïa kiwei pat ki jaitbynriew riewlum hynrei ki la ong ba ki don ruh ki don ïa ka hok ban ïoh bhah lang. U Kabir u la ong ba naduh ba ka Meghalaya ka ïoh ïa ka jylla lajong, ka jingdon ki nongshong shnong bym dei riewlum ka long 20%. U Kabir u la kam ruh ba ki Muslim kiba shong basah ha rilum Garo ki don bynta lang ha ka jingïakhun Hills State ha kito ki por.
