Shillong, Jymmang: Ka Office jong Ka Deputy Commissioner, East Khasi Hills District, ka pyntip ba ka sorkar India ka ai por ïa ka sorkar Jylla ban pynbiang ryntih noh mar mar ïa ki Aadhaar jong ki longkmie kiba armet bad ki khyllung khynnah kiba dei ban ïoh ïa ka skhim jingbam ne ka “Special Nutrition Programme”. Baroh ki hap ban pynbiang ïa ki aadhar jong ki lym kumta kin duh ïa ki jingmyntoi ba ki ïoh na kane ka skhim.
Ka jingdon jong ka Aadhaar Card ka long kaba donkam ruh na ka bynta ka skhim MGNREGA (skhim shispah sngi), MHIS (skhim ïarap siew bai dawai bad bai sumar), NFSA (khaw rashon) bad kumjuh ki kam kiba ïadei bad ki Bank, Scholarship (bai bam khynnah pule), NSAP (bai bam tymmen), LPG connection (ban ïoh gas ha ïing) mobile connection (ban ïoh sim card) kumta ter ter.
Halor kitei ki lad jingïarap, ka Ophis jong Ka Deputy Commissioner, East Khasi Hills District ka kyntu ïa baroh ba kin sngewbha ban leit mih sha ki jaka ba la pynbeit da ka Ophis jong ki Block Development Officer bad rah lang ïa ki kot kiba donkam kum ki Birth Certificate jong ki khun jong phi bad ka EPIC jong phi ban ïoh ban register Aadhaar.
Lada ki khun ki kti jong phi kim pat don ïa ka Birth Certificate, kin sngewbha ban kit khia ban ïoh ïa ki Court Order kham kloi khnang ba ki CHC/PHC kin ïoh ban pynkhreh ïa ki Birth Certificate. La kyrpad ïa baroh ki nongshong shnong ka Distrik ba kin shim khia khnang ba ki ym duh jingmyntoi na ki skhim sorkar.
