Shillong, Nailur, 29: Ka jingshah sospon jong u Syiem ba pura ka Hima Nongspung u Pa’iem Petrick Syiemïong ha ka tnat Ilaka jong ka Khasi Hills Autonomous District Council (KHADC) halor ki jingkynnoh leh donbor ka la pynlong ïa u Syiem ban pynrem jur ïa ka District Council.
Ha ka jingïakren bad ki lad pathai khubor hynnin ka sngi Saitjaiñ u Paiem Petrick Syiemïong u la ong, “u Deputy CEM uba peit ïa ka tnat Ilaka, u Bah Pynshngaiñ N. Syiem u la shu sospon jubor ïa nga khlem kino kino daw kiba shongnia bad ki bym don ruh ka nongrim tang da ka jingujor jong ki briew ki bym dei ki dkhot jong ka Executive Committee ka Hima hynrei ki dei tang ki riew madan kiba ap masi ap blang.’
U la pynpaw ka jinglyngoh ba mar ïa sospon ïa u na ka khet Syeim tang katno katne sngi ka tnat Ilaka jong KHADC ka la pynmih da ka jingpynbna ba la thung Acting Syiem ïa u Bah Kyntiewborlang Syiemlieh.
U Paiem Petrick Syeimiong u la dawa ïa ka KHADC bad khamtam eh ïa u Dy. CEM uba peit ïa ka tnat Ilaka ba lada u dei u khrawpyrkhat u dei ban pyndam noh mardor ïa u Acting Syiem u Bah Kyntiewborlang Syeimlieh hapoh lai sngi.
