Shillong, Nailar, 23: Ka All India Trinamool Congress (AITC) ha ka sngi Thohdieng ka la dawa ba dei ban thung da ka jingtohkit halor ka jingkynnoh jong ka seng Congress ba ka seng NPP kaba bat ïa u lakam synshar ka la pyndonkam da ka pisa be-aiñ ban khroh ïa ki MLA jong kiwei pat ki seng saiñpyrthei.
Ha ka jingïakren bad ki lad pathai khubor, u nongïalam jong ka TMC u Mukul Sangma uba long ruh u Myntri Rangbah barim ka jylla u la ong ba u President ka Congress u Bah Vincent H Pala u la kren tyngeh bha da kaa ong ba ka Party kaba bat ïa u lakam synshar ka la khwai ïa ki MLA na kiwei ki seng saiñpyrthei da kaba pyndonkam da ka pisa “be-aiñ.”
“Kumta haba mih kine ki jingkynnoh, ka Sorkar bad ki nongïalam ki dei sait khuid halor kane bad nga kyntu ban thung ïa ka jingtohkit halor kane ka kam,” u la ong.
“Ki don lai tylli ki jingkynnoh. Kawei ka dei halor ka pisa be-aiñ kaba la kynnoh ba ka wan na u drok, kawei pat ka dei ka pisa kaba la kynnoh ba ka wan na ka jingtih dewiong be-aiñ bad kawei pat ka dei ka jingleh thok ïa ki kam kontrak. Kumta lada kine ki lai tylli ki jingkynnoh ki la mih ka donkam ba ka ïingdorbar kan ïathir ïatai halor kane,” la bynrap u Mukul.
Haba kylli, u Myntri Rangbah barim u la ong ba ka party kan sa peit lada ïohlad yn sa rah ïa kane ka mat ban ïakren hapoh ka Dorbar Synrai jong ka ïingdorbar Thawaiñ.
“Ka lad ka long tang lyngba ka Adjournment Motion bad hapoh ka No Confidence Motion pyrshah ïa kane ka Sorkar. Kumta ngin hap ban bishar bniah ïa kine bad ngi hap ban tip ruh kumno ban leh hapoh ka Ingdorbar Thawaiñ. Kumta ha kawei ka rukom, ka drama baroh kawei kaba la paw ha kane ka jingjia kaba dang shen ka don ka jingktah kaba mih na ka jinglong ryntih ha ka rukom synshar paidbah. Kumta ka jingdon jong kiba pyrshah ka la nang hiar bad bad kata kam dei ka dak kaba bha na ka bynta ka jingkhih bad jingneh jong ka synshar paidbah,” u la ong.
Haba kyntu ïa ki paidbah ban dawa na ka liang synshar ba kan wan khuid halor katei ka jingkynnoh, u Mukul u la ong, “kumta ki paidbah ki hap ban kylli ïa ki hato ki leh shisha neem ïa kine ki kam be-aiñ, kaba lah ban wanrah jingeh ïa ka jylla bad ki paidbah. Lada ki don ki daw ban ngeit ba la pyndonkam ïa ka pisa be-aiñ bad nangno kane ka pisa beaiñ ka wan bad ka pisa beaiñ ka thmu na ka bynta kaei? Kumta kata ka mut ba ki paidbah ki hap ban kylli jingkylli bad ka Sorkar ka hap ban pynshai halor kane, kim lah ban shu sngap jar. Ka dei ka jingkynnoh kaba khia bha namar lada ki jingkynnoh ki long kiba shisha phi lah ban sngewthuh ïa ka lawei kaba kumno ngi sa ïohi ha ki snem ki ban wan.”
“Nga ruh nga don ruh ki daw ban ngeit katkum kino kino ki jingtip kiba nga ïoh. Lada phi leit sha Khyndai Lad janmiet la ong ïa nga ba la bthah ïa nga ban leit peit. Leit sha kino kino ki bynta bynta bapher bapher jong ka nongbah Shillong, phin sa ïohi ki jait kam be-aiñ kiba jia bad ka jia beit ha kane ka nongbah. Ka dei kaba lah ban jia khlem ka jingshah pynshitom lymda don kano kano ka jingïada,” u la bynrap
Dang shen, u Bah Pala u la pynmih ïa ki jingkynnoh hadien ka jingleit pynïasoh jong ki lai ngut ki MLA ka Congress sha ka NPP.
