Shillong, Nailur 07: U MLA barim ka Mawsynram u Bah Himalaya Muktan Shangpliang ha ka sngi palei u la ong ba ka post Adviser na ka bynta ka tnat Pule Puthi ka dei kaba tyrwa hi da u Myntri Rangbah ka Jylla u Conrad K. Sangma bad u Symbud Myntri Rangbah u Bah Prestone Tynsong.
U la kynnoh ba kane ka long hadien ba u State President ka BJP u Bah Ernest Mawrie u la phah pynsangeh ïa u MLA ka Pynthorumkhrah Constituency u Bah A.L. Hek uba long ruh u Myntri Sorkar ban phah ïa ka shithi sha u Myntri Rangbah ba la mynjur ïa ka kyrteng jong u Bah Shangpliang bad u Bah M. Kharkrang ban aikam. Hynrei u Bah Mawrie u la kyrpad pynban ban pynrung da ka kyrteng jong u bad ban phah sha u Myntri Rangbah.
“Ka shuki Adviser la tyrwa hi ïa nga da u Myntri Rangbah u Conrad K Sangma bad u Symbud Myntri Rangbah u bah Prestone Tynsong. Kine ki arngut ki rangbah ki la kylli la nga la ïoh ne em kano kano ka post? Nga la ong em. Mar mar ki la ong ba phi lah ban leit shim ïa ka shithi thungkam lashai,” la ïathuh u Bah Shangpliang ha ka jingïakren bad ki lad pathai khubor.
Une u MLA barim u la ong ba u la kyrpad ïa u Bah Mawrie ban phah ruh ïa ka kyrteng jong ki saw ngut ki MLA barim bad ïa ka kyrteng u ophisar IPS barim sha u Myntri Rangbah ban mynjur na ka bynta ki katto katne ki kam hynrei um shym la leh eiei satia.
“Kaba kham pynlynngoh, haba nga la ïoh ïa ka shithi ba la thung kum u Adviser, u Bah Hek u la telephone ïa nga ban phah wan sha ka kamra jong u bad ynda nga la leit sha kamra u la ai khublei ïa nga bad kylli kumno phi ïoh ïa ka shithi thungkam, mano ban mynjur ïa phi, nga la ong ba nga ïoh na u Myntri Rangbah,” u la ong.
U Bah Shangpliang u la ïathuh ba u Bah Hek u la phla ba dei u Bah Mawrie uba la bthah ïa u ban pynsangeh ban phah ïa ka shithi jingmynjur ïa ka kyrteng u Bah Shangpliang bad u Bah Kharkrang sha u Myntri Rangbah.
“U Bah Hek u la phla ïa kaei kaei kaba nga kyndit haduh katta katta..ba u Bah Hek u ladep mynjur ïa ka kyrteng jong nga bad u Bah Kharkrang ha ka shithi DO na ka bynta ban aikam bad ïa ka shithi la phah sha u Myntri Rangbah. Kum ka jingsngew burom, u Bah Hek u la telephone ïa u Bah Mawrie bad ong nga la phah ïa kawei ka shithi sha u Myntri Rangbah da kaba mynjur ar tylli ki kyrteng- u Bah Shangpliang bad u Bah Kharkrang – na ka bynta katto katne ki kam. U Bah Mawrie u la ong ba un pynsangeh shwa bad ong ap ngan da wan sha ka kamra jong phi. Mar mar u Bah Mawrie u la leit sha ka kamra u Bah Hek bad ong ba un tar shisyndon ïa ka shithi ba la mynjur ïa ka kyrteng jong nga. Phi lah ban kylli na u Bah Hek ban pynshisha ïa kane. Hadien kata, u Bah Hek da ka jingbym banse namar ka jingkyrpad jong u President ka party u la hap ban tar ïa ka shithi bad hap ban mynjur da ka kyrteng u Bah Mawrie,” la ong shuh shuh u Bah Shangpliang.
“Kumno phi lah ban shet kylla? Kane ka dei ka jingleh bym hok, kane ka dei ka jingshet kylla. Haba nga la kyrpad ïa u ban mynjur ïa ki san ngut ki kyrteng napdeng jong ngi sha u Myntri Rangbah na ka bynta ki katto katne ki post, hynrei ïalade pat u la leit na kyrpong iing ban phah tar ïa ka shithi ha u Bah A.L. Hek bad phah pynrung bujli da ka kyrteng jong u. Mynta ka shong sa ha u Bah Mawrie bad u Bah Hek ban pynshai namar ba ïa kane la ïathuh hi da u Bah Hek ha nga,” la bynrap u Bah Shangpliang.
