Mawkyrwat, Nailur 07: Ka Meghalaya Estimate Committee jong ka Sorkar Meghalaya ka la hiar sha South West Khasi Hills District ban jurip ïa ka jingtei ïa ka Industrial Training Institutes (ITI) kaba don hapoh Shnong Sakwang, South West Khasi Hills District. Ïa kane ka ITI la tei ha ka jingmang pisa kaba T.7 klur tyngka lyngba ka ESDI Scheme jong ka Sorkar India.
Lah ban kdew ba ha kane ka Industrial Training Institutes (ITI) yn sa ïoh ban pynrung ïa ki 5 jait ki jait jinghikai na ka bynta ki samla jong ka dong ka thaiñ kata ha ka Surface Embroidery Trade (SET), ki Wiremen, ka Office Assistant and Computer Programme (OACP), Multimedia Animation & Special Effect (MA&SE) bad ka Driver-cum-Mechanic (DcM).
Ha ka jingjurip jong ka Meghalaya Estimate Committee ïa ka ITI ha shnong Sakwang, la lap ba kane ka jingpyntrei ka la long 100% ha ka jingtei hynrei lyngba ka jingïathuh jong ka Director Employment and Craftsmen Training, Shillong kaba sah mynta ban pyndep ka long sa tang ïa ka um bad kumjuh ruh ïa ka bording.
Kumta na ka liang u Bah Mayralborn Syiem, MLA ka Nongpoh Constituency uba dei u Chairman jong ka Meghalaya Estimate Committee u la buh ka jingkyrpad na ka bynta ka PWD (Building) ba kam dei ban pynsah teng hynrei ka dei ban leh noh ïa kaba donkam da kaba phah jingthoh sha ki ar tylli ki tnad ophis kata sha ka PHE bad sha ka MePDCL khnang ba yn lah ban pynbiang ha ka por kaba dei bad ba ka jingthmu ban pynïaid shakhmat ïa kane ka jaka ai jinghikai ïa ki samla kan long kaba ïaid beit ïaid ryntih.
Ïa kane ka komiti la lamkhmat da u Bah Mayralborn Syiem, MLA ka Nongpoh Constituency uba dei u Chairman jong ka Meghalaya Estimate Committee ryngkat ka jingsynrang ki katto katne ki MLA kata u Bah Renikton Lyngdoh Tongkhar, MLA ka Mawkyrwat, u Bah Adelbert Nongrum, MLA ka North Shillong, u Bah Wailadmiki Shylla, MLA ka Jowai, ka Miani D. Shira, MLA ka Ampati, u Reminton G. Momin, MLA ka Rambrai, u Bah Damanbait Lamare, MLA ka Umroi bad u Arbinstone B. Marak, MLA ka Selsella Constituency.
Kiwei pat kiba ïadonlang ki long ka Kong Anita Kharpor, Director Employment and Craftsmen Training, Shillong, ka Kong Y.R. Mawlong, MCS, Additional Deputy Commissioner, South West Khasi Hills District, u Bah D. Mawlein, Deputy Superintendent of Police, South West Khasi Hills District, u Myntri Shnong Sakwang, u Bah S. Kharjahrin, ki ophisar napoh ka PWD (Building), lem bad kiwei de.
