Shillong, Jylliew, 16: Ka Meghalaya State Education Commission (MSEC) ka la phah ïa ka kaiphod (interim report) ha kaba ïadei bad ka jingkyntiew ïa ka tulop jong ki nonghikai skul Adhoc Upper Primary School.
Ïa kane la pyntip da u Secretary ka Meghalaya Upper Primary School Teachers Association (MUPSTA) u Bah S. Lamare ha ka jingïakren bad ki lad pathai khubor ha ka sngi Saitjaiñ.
U la ong ba ka Association shen kan sa buddien bad ban peit ha kano ka rukom ka Sorkar kan pyntreikam ïa ka kaiphod.
U Bah Lamare u la ong ba ki nonghikai skul Adhoc ki dei kiba la shakri la slem bha bad ki don ruh katto katne ki nonghikai kiba la khladnoh ki bym shym la ïoh jingsiew bad kiba la noh ka rta ki hap ban shu im khlem kano kano ka jingïoh jingmyntoi.
U la ong ba naduh ki snem 1993-94 ïa ki skul Adhoc ha ka jylla ym pat shym la kyntiew sha ka kyrdan Deficit System.
“Ngi sngewnguh ïa kaei kaba ka Commission ka la leh bad ngin sa buddien halor kane,” la ong u Bah Lamare.
Haba pynpaw ba ka kam bad ka jingsiew ka dei ban long markatjuh u Bah Lamare u la ong, ba ka tulop kaba ki nonghikai skul Adhoc ki ïoh ka dei ban long kaba mar ïaryngkat bad ka tulop kaba la siew ïa ki nonghikai skul Sorkar ne ïa ki nonghikai jong ki skul Deficit.
“Ngi la ïoh jingtip ba ka MSEC ka ladep phah ïa ka kaiphod sha ka Sorkar bad ïa mynta ngim pat shim rai eiei ban pynlong ïa ki jingïakhih,” u la ong.
Ka Sorkar Jylla ka la thaw ïa ka MSEC ha u Naitung jong u snem baladep ïa kaba la khlieh da ka Prof. Sherwin May Sungoh na ka Department of Education, NEHU kum ka Chairperson ban ai jingmut sha ka Sorkar ha kaba ïadei bad ki jingeh jong ki skul bad ki kolej, ka tulop nonghikai skul bad kolej, ka jingtreikam jong ki School Managing Committee bad kiwei kiwei.
Ha ka jingïalang ka MUPSTA ka la pynkup burom ruh ïa u President barim jong ka seng u Bah Kenneth Shadap uba la shakri mon sngewbha la bun bun snem kum u nongïalam jong ka Association bad uba la noh synniang shikatdei ban trei na ka bynta ka bha ka miat jong ki nonghikai skul Adhoc Upper Primary.
