Shillong, Lber, 17: Ki nongïalam jong ka Ri Bhoi Poultry Farmers Association ha ka Lah Sngi u Blei ki la pynsngew sha ki tyndong skhor jong u Myntri ka Sorkar Jylla uba khmih ïa ka tnat Animal Husbandry and Veterinary u Bah AL Hek halor ka jinghiar dor shaba palat ka dor jong ki syiar kaba la ktah haduh katta katta ïa ki nongri syiar kiba im kamai jakpoh ha them Ribhoi.
Ha ka jingïakren bad ki lad pathai khubor ka President jong ka seng ka Kong E. Lapang bad u Vice President Bah A. Diengdoh ki la ïathuh ba ka jingpynsngew sha u Myntri ka Sorkar Jylla ka long ban pyntip ïa ki jingeh ba ki nongri syiar ki ïakynduh na ka jinghiar ka dor ka mur hapoh iew bad kyntu ruh ïa ka sorkar ban thawlad da kaba ai Subsidy khamtam haba ki nongrep ki thied ki jingbam syiar namarba ka jingkiewdor jong ki jingbam syiar ka ktah pat ïa ka ïoh ka kot jong ki nongri syiar.
Ha kajuh ka por, ki nongïalam ka seng ki la pynsngew ruh ha u Myntri ïa ka jingïoh rung laitluid ki syiar kiba wan nabar ka jylla kaba la ktah haduh katta katta ïa ka kamai kajih jong ki nongri syiar trai jylla. Halor kane, ka sorkar ka la pynsangeh mardor ban wanrah ïa ki syiar kiba nabar ka jylla na ka daw ka jingsaphriang jong ka jingpang Avian Flu ha ki katto katne ki jylla.
