Shillong, Naitung, 04: Ki nongialam ka Khasi Students Unoin (KSU), Central Executive Council ha ka sngi Saitjaiñ ki la hiar sha ka shnong Domiasiat, South West Khasi Hills District ban iakynduh ia ki khun ki ksiew bad ki bahaing hasem jong i meiieit Spelity Lyngdoh Langrin (bam kwai ha dwar u Blei) hadien ba ka seng ka la ioh jingtip ba ki don ki Agent kiba la hiar sha kane ka shnong ban thied jaka.
Ia ki nongialam ka KSU la synran lang da ki nongialam barim ka seng, ba kynthup ia u Vice President barim u Bah Danny M. Khryiem, u President barim u samla Lambokstarwell Marngar, u General Secretary barim u samla Donald V. Thabah.
Ha ka jingiakren bad ki lad pathai khubor, u President ka KSU u samla Raymond Kharjana u la ong, “ka jingwan jong ngi sha kane ka shnong (Domiasiat) ka long halor ka nongrim ba ngi la ioh jingtip ba ki don ki Agent kiba la wan hiar sha kane ka shnong da ka jingthmu ban thied jaka namarba kane ka shnong ka don ia u mawpohkhyndew Uranium, da kaba pynbiej ia ki trai shnong.”
Katkum ka jingiathuh u President ka KSU, la ioh jingtip ba uwei na kita ki Agent u dei u MLA barim na kawei ka Constituency ha them Ribhoi uba la hiar shajan ka shnong Domiasiat. “Ngi la ioh jingtip ha ka sngi ba la pynskhem ia ki nongialam ba thymmai ha ka 6 tarik Jyllliew, 2026 ba ki la don ki Agent kiba wan sha kane ka thain tangba kim shym la nud ban rung sha ka shnong Domiasiat,” u la ong.
“Ha ka Central Executive Council ngi la shim ia ka rai ban ieng pyrshah ia ka jingthmu ka Sorkar India ban khlong ia u Uranium na ka shnong Domiasiat,” la iathuh u Samla Kharjana bad bynrap ruh ba ha ka jingiakynduh dang shen ia u Myntri Rangbah ka jylla u Conrad K.Sangma ka seng ka la kren shai ba kan pyrshah beit ia ka jingthmu ban tih ia u Uranium na ka shnong Domiasiat.
U la iathuh ba ki la don ki paradoh parasnam kiba dei ki nongkyrshan kiba ju don ha syndah ka KSU kiba la shah pyntieng kohtympan ha ka Sorkar da kaba shah khot hajir hakhmat ka tnat Pulit bad ka CBI tang namarba ka seng ka la ieng pyrshah ia ka jingthmu ka Sorkar India ban tih ia u Uranium na ka shnong Domiasiat.
Na ka liang u khun heh i meiieit Spelity u Bah Phrijune Lyngdoh Langrin u la ong ba ka jingpyrshah bad ka jingkyntait ka kmie jong u ia ka spah klur ba la tyrwa da ka Sorkar India lyngba ka Uranium Corporation of India Limited (UCIL) ka dei ka dawbah ba ka Sorkar kam shym la shna satia ia ka surok kaba paka kaba pyniasoh sha ka shnong Domiasiat.
Katba u Bah ND Syiem uba dei u pyrsa kurim jong i meiieit Spility, u la iathuh ia ka jingrung jingmih jong ki ophisar ka Atomic Energy sha ka shnong Domiasiat kaba dang iai bteng haduh mynta bad suba ruh ba ka dang don eiei sha lyndet namarba ki dang tes beit ia ka jingdon u Uranium.
Shwa kane, ki nongialam bad ki dkhot ka seng ki la leit ban buh syntiew ha u lum jingtep jong i meiieit Spelity ha ka shnong Domiasiat bad rwai ruh ia ka jingrwai ieid ri, “Ri Khasi, Ri Khasi,” kum ka jingpynskhem jong ka seng ia ka jingpyrshah ban tih ia u Uranium.
