Shillong, Lber, 26: Saw ngut ki kyrtong kiba aireng ha ka elekshon Lok Sabha na Shillong Seat ki la thep kyrteng ha ka sngi baar.
Kine ki saw ngut ki long u Sitting MP ka Shillong Seat u Bah Vincent H. Pala na ka Congress, u Bah Robert June Kharjahrin uba ïakhun kum u kyrtong monlang ka Regional Democratic Alliance (RDA), u Dr. Ricky AJ Syngkon na ka VPP bad u Prof. Lakhon Kma uba ïakhun kum u Kyrtong Shimet.
Kan long ruh ka kynti kaba u Bah Vincent H. Pala un ïakhun ban shah jied biang kum u MP ka Shillong Seat hadien ba u la mihkhmat la lai samoi kynthih naduh u snem 2009.
Haduh mynta, ka jingthep kyrteng jong ki kyrtong ha Shillong Seat ka la kynjoh haduh san ngut kynthup ïa ka kyrtong ka NPP ka Dr. Amparen Lyngdoh kaba la thep kyrteng ha ka taiew baladep.
Ha ki kynta ba kitei ki saw ngut ki kyrtong ki la thep kyrteng la sakhi ba kim shym la wan ïalam satia ïa ki nongkyrshan kumba ju long ha ki snem baladep namarba ka wanrah ïa ka jingdheng kali kaba jur ha nongbah Shillong.
Ïa u Bah Pala la synran lang da ki nongïalam ba hakhmat ka Party kynthup ruh ki nongïalam jong ka Mahila Congress. Ïa u Bah Robert June Kharjahrin la synran lang da u President ka UDP Bah Metbah Lyngdoh, President ka HSPDP Bah KP Pangniang, ki MLA ka UDP bad katto katne ngut ki nongïalam bahakhmat.
Ïa u Dr. Ricky la synran da ki MLA ka party ba kynthup ïa u Bah Adelbert Nongrum, Bah Brighstarwell Marbaniang, Bah Heavingstone Kharpran bad katto katne ngut ki nongïalam, katba ïa u Prof. Lakhon Kma la synran da ki nongkyrshan bad ki bahaing hasem.
Katkum ka jingpyntip jong u Returning Officer ka Shillong Seat, ka Seng Congress ka la phah thep kyrteng ruh u Bah Manuel Badwar kum u Stand-by Candidate.
