Mairang, Lber, 26: Ka jingiohpang jong kawei ka longïing na ka shnong Riangmang, Eastern West Khasi Hills District hadien ba ki la bam ia ka doh sniang ba ki la thied na uwei u nongdie doh uba ju die doh hapoh shnong ka la pynlong ia ka shnong Riangmang ba kan tait shnong ia une u nongdie doh hadien ba ka Dorbar ka la rai pynrem ia u kum u nong aibih.
Katkum ka jingiathuh u Bah Khotkupar Lyngdoh Nongum ha ka jingia kynduh jong u ia ki lad pathai khubor hadien khyndiat kynta ba u la ujor da ka ejahar na ka ophis u Superintendent of Police ka Eastern West Khasi Hills District pyrshah ia ka shnong Riangmang, u la ong, ba ka jingiohpang jong kita ki briew kiba bam ia ka doh ba u die ma u ka dei naduh ka 28 tarik u Rymphang 2024 bad hadien ka jingkempang ki la leit shim dawai na Mairang bad ki Doctor ki la iathuh ba ka jingpang ka dei na ka bam hynrei kine ki briew hadien kata ki leit shim dawai sa na u nong ai dawai bih.
U Bah Khotkupar ula iathuh ba ha ka jingleit ia kynduh ia ki, kine ki briew kim shym la kynnoh ba u dei uba ai bih hynrei kyndit kynsan ha ka 22 tarik u Lber 2024 ka shnong Riangmang ka la tait shnong ia u.
U Bah Khotkupar u la ong ruh ba u shaniah ha ki bor jong ka ain ba kan ai ia ka jingbishar kaba hok namarba u khlem leh kumba u la shah pharep ha ka shnong Riangmang ba u dei u nong aibih, u nong ai ksuid bad kiwei kiwei ki jingshah kynnoh.
