Shillong, K’lyngkot, 20: U Myntri ka Sorkar Jylla u Bah Sanbor Shullai ha ka sngi Baar ula tyrwa hakhmat u Myntri ka Sorkar Pdeng uba khmih ïa ka tnat Tourism and Culture u Ganjendra Singh Shekhawat ha ka jingïakynduh ha ïingsah jong u ha New Delhi, ban mang ïa ki skhim bapher bapher ha Meghalaya ban ïada ïa ka lariti jong ka Seng Khasi, ka Seng Raid bad ka Songsarek Garo.
Ha u kyrwoh ba la phah sha ki lad pathai khubor, u Bah Shullai u la banjur ba la donkam ban buh ïa ka iew tynrai kaba pyni ïa ka jingriewspah jong ka thaiñ Shatei Lammihngi ha CRPF Camp, Mawlai bad u la kyrpad ïa u Myntri ka ban wan jngoh hi dalade ïa kane ka jaka khnang ban pynthikna ïa ka jingdonkam ban kyntiew ïa ka kam jngohkai pyrthei jong ka tnad.
U Bah Shullai u la kyrpad ruh ïa u Shekhawat ban sdang ïa ka skhim pynroi kam jngohkai pyrthei ha South Shillong Constituency ryngkat bad ka projek shna Ropeway namarba kan ai kam ai jam ïa ki paidbah nongshong shnong trai jylla.
