Shillong, Risaw, 16: U Myntri Rangbah ka Jylla u Conrad Kongkal Sangma ryngkat ka jingsynran lang jong u Chief Secretary u Bah D.P. Wahlang, u Director General of Police ka Jylla u Dr. L.R. Bishnoi, ka Deputy Commissioner jong ka East Khasi Hills District ka Kong R.M. Kurbah bad kiwei kiwei ki heh ophisar ka Sorkar Jylla ha ka lah sngi U Blei ki la leit jngoh ïa ka ïing mala ki Singhania ba la pluh ha ka sngi Saitjaiñ jong ka taiew baladep ha Thana Road, Police Baar.
Ïa ka ding la lah ban pynlip hadien 40 kynta ka jingïakhun jong ki Pulit ka tnat Pynlip ding bad ki bor shipai.
Hadien ka jingjurip u Myntri Rangbah u la shong pyrkhat kam bad ki Ophisar halor kane ka jingjia. U la bthah ruh ïa ki Ophisar ban ai kaiphod halor kane ka jingjia, kaba la dkhat ruh ïa kawei ka mynsiem briew. U la bthah ruh ïa ki Ophisar ban sorjamin ïa ki jingshngaiñ jong kane ka ing mala bad ban wad ïa ka daw jong ka jingsdang ka jingpluh jong ka ding.
U Myntri Rangbah u la pynpaw ka jingsngewlem ïa ka longiing longsem kiba la shah ktah ha kane ka jingjia. U la ong ba kane ka jingjia kaba sngewsih ka la ktah bha namar ba ka la jia ha ka jaka iew kaba dei ka kad khaii, kaba khim, bad kaba buh jingeh wat ïa ki kali pynlip ding ban rung. U la ong ba kane ka dei ka jingshah tynjuh kaba khraw bha, hynrei la jan baroh ki nongtrei jong ki tnat treikam bapher bapher, khamtam ka tnat Fire and Emergency Services, ki shipai, ki shipai suiñ, Assam Rifles, BSF, Pulit, ki bor synshar District bad ki paidbah ki la ïatreilang ban tem ïa ka jingpluh jong ka ding.
U la ïaroh ruh ïa ki kynhun bapher bapher, kiba la pynthikna ba ka ding kan ym pur sha kiwei pat ki ing mala kiba don markhap bad sha ki ing shong briew. U la ïathuh ba ïa ka jingtip kaba bniah yn sa lum halor kane ka jingjia khnang ban lap ïa ka daw tynrai ka jingsdang jong ka ding.
“Ngin sa peit bha halor kane ka kam bad ngin sa wanrah da ki lad ki lynti kumno ban tem bad ban kiar ïa kum kine ki jingjia ha ki sngi ki ban sa wan,” u la ong.
U la ong ba kane ka ïing mala ka don bun tylli ki kudam bad dei na kane ka daw ka la buh jingeh bha ïa ki kynhun ai jingïarap watla ki la pyrshang katba don la ka buit bad ka bor ban ïakhun pyrshah ïa ka jingpur jong ka ding.
U la ong ba ha ka jingïalang jong ka Kynhun Myntri ka ban sa long ha ka 18 tarik mynta u bnai, yn sa ïathir ïatai halor kane ka jingjia.
Kane ka jingjia pluh ding ka la pynkynmaw ruh kumno ban shim ïa ki lad jingïada. Ka Sorkar ka dei ban shim ïa ki lad ki lynti ban pynthikna ba baroh ki ïing mala ha ka jylla ki dei ban don ïa ki tiar pynlip ding.
