Shillong, Jylliew 14: U Symbud Myntri Rangbah ka Jylla u Bah Sniawbhalang Dhar ha ka sngi Balang u la iathuh ba ka Regional Committee kan sa leit ban sorjamin ia ki jaka ba don ha ka jingiakajia pud ha West Jaiñtia Hills District bad West Karbi Anglong District ha ka taiew ba khatduh jong une u bnai Jylliew, 2023 shwa ban phah ia ka kaiphod sorjamin sha ki Sorkar Jylla ha u bnai Nailar, 2023.
Ka Regional Committee kaba la shong ia ka jingialang ha ka sngi Balang ha nongbah Shillong kan sa bishar bniah ia ki jaka ba iakajia pud ha Block I (Psiar-Khanduli) kaba don ha khappud jong ka West Jaintia Hills District bad ka West Karbi Anglong District.
Ha kane ka jingialang la iashim bynta lang da ki Deputy Commissioner jong ka West Jaintia Hills District bad ka West Karbi Anglong District, ki dkhot jong ka Jaiñtia Hills Autonomous District Council bad ka Karbi Anglong Autonomous District Council bad kynthup ruh ki nongialam shnong na ki ar tylli ki district jong ka jylla Meghalaya bad Assam.
Ha ka jingialang ba la pyniaid da u Bah Sniawbhalang Dhar uba long ruh u Chairman jong ka Regional Committee na ka bynta ka West Jaiñtia Hills ryngkat ka jingdonlang jong u Piyush Hazarika uba long u Myntri ka tnat Information and Public Relations ka Sorkar Assam, la mynjur ba ki dkhot jong ka komiti kin sa leit sorjamin lang ryngkat bad ki Myntri Rangbah jong ka Jylla Assam bad Meghalaya.
“Ngim pat lah ban shim rai eiei halor ka jingiashim ne ka jingiaai, ia mynta ngi dang iakren tang ban leit sha ki shnong kiba don jingiakajia bad ban sngap ia ka sur jong ki paidbah khnang ban pynkut noh ia ki jingiakajia na baroh ar tylli ki jylla,” la iathuh u Bah Dhar ha ka jingiakren bad ki lad pathai khubor.
“Shuh shuh, ka Regional Committee ka la rai ban aiti ia ka kaiphod sorjamin sha ki Sorkar ha u bnai Nailar. Shwa kane, ngin sa leit sorjamin shwa ia ki jaka ba don ka jingiakajia pud ha kaba kut taiew jong u bnai Jylliew lane ha kaba sdang jong u bnai Naitung, ryngkat lang bad ki Myntri Rangbah,” u la bynrap.
Ka regional committee kan sa shong biang ia ka jingialang ha u bnai Naitung, la iathuh u Bah Sniawbhalang Dhar.
