Shillong, Jylliew, 14: U Chairman jong ka Regional Committee na ka jylla Assam u Piyush Hazarika u la kynnoh ba dei ki runar kiba ju thaw jingkulmar ha khappud jong ka thaiñ Block-I, kaba don ha khappud jong ka West Jaiñtia Hills bad West Karbi Anglong.
Ia kane, u Hazarika u la pynpaw ha ka jingiakren bad ki lad pathai khubor hadien ba la wai ka jingialang banyngkong eh jong ka Regional Committee kaba la long ha nongbah Shillong ha ka sngi balang.
Haba kylli, hato kine ki runar ki dei neem na ka jylla Assam, u Hazarika, u la ong, “ki runar kin dei beit ki runar, ngim lah ban ong la ki dei na Assam ne na Meghalaya bad ngi lah ban ong ba kim dei satia ki briew jong ngi bad kumno phin ithuh ia kita ki runar da kaba shu shong nangne hynrei ki paidbah ka jylla Assam ki dei kiba don ka jingiaieid bad ka jingiadei kaba jan bad ki paidbah ka Meghalaya bad nga ngeit ba ki paidbah ka Meghalaya ruh ki don ka jingieid ia ki paidbah ka jylla Assam”.
Halor ka jingjia ha ka shnong Khanduli, u Hazarika u la pynpaw ia ka jingsngewkhia bad ong, “ngim dei ban don ka jingiakajia hynrei ngi dei ban don ka jingiadei kaba jan bad ki paidbah ka Meghalaya. Ki paidbah na ka Jylla Meghalaya bad ka Assam ki im hapdeng ka shongsuk shongsaiñ bad ka sorkar jong ngi bad ki Myntri Rangbah ruh ki angnud hi tang ia kata.”
Dang shen, ka la mih ka jingiakynad kaba jur hapdeng ki Karbi bad ki Pnar ha ka shnong Khanduli, West Jaintia Hills District kat haduh ba ka la jia ka jingiapynibor kaba mar kylliang.
“Ngim don kano kano ka daw bad ki paidbah ka Meghalaya. Ngi don ka jingiadei kaba jan bad ka Meghalaya bad ngi burom ruh ia ki paidbah ka Meghalaya bad ia ki paidbah jong kiwei kiwei ki jylla ha ki jylla jong ka thaiñ Shatei Lammihngi,” ong u Hazarika.
