Shillong, Nailar, 12: Shwa ba ka samla Banrilang Lyngdoh kan mih na la ka jong ka iing ka sem ban leit ïashim bynta ha ka rynsan ïakob ïakhun kti kaba la tip kum ka World Arm Wrestling Championship 2024 ka ban sa long ha Maldova kata naduh ka 16 tarik u Nailar haduh ka 25 tarik, Nailar, 2024, ki khynnah skul barim jong ka Alumni Association jong ka Nativity Higher Secondary School, Mawkyrwat bad ki khynnah kiba pule ha kane ka skul ki la ai khublei kitbok kitrwiang ïa kane ka samla da kaba ai sngewbha ïa ka song pisa kum ka bai rneng ha lynti.
Ka samla Banrihun Lyngdoh, 16 snem ka rta na ka shnong Marshyllong, South West Khasi Hills District ka dei kaba dang pule ïa ka Class-9 ha Naitivity Higher Secondary School, Mawkyrwat ka long ruh kaba ieit bha ïa ka jinglehkai Sports khamtam ïa ka jinglehkai Arm Wrestling.
Ka samla Banrihun Lyngdoh ka la sdang shwa na skul ban ïashim bynta ha ka jingïakob ïakhun kti bad ka la ïoh lad ban ïa shim bynta sa ha ka District Level, ha ka State Level bad kumjuh ruh ha ka National Level.
Dang ha u bnai Jymmang 2024 kane ka khun samla ka la ïoh ban leit shim bynta ha ka rynsan ïakob ïakhun kti kaba la long ha nongbah Nagpur, Maharashtra bad ka la jop ïa ka kyrdan baar bad ka kyrdan kaba lai.
Ha ka jingai khublei kitbok kitrwiang ïa kane ka samla, la sakhi lang da u Principal jong ka Nativity Hr. Secondary School, Mawkyrwat u Rev. Fr. Alphonsius Wahlang, u President jong ka Alumni Association u Bah Kynpham V. Kharlyngdoh, u Secretary Bah Kitborsing Lyngdoh, ki dkhot jong ka Alumni Association bad ki khynnah pule jong ka skul.
