Shillong, Nailur, 21: Ki Pulit ka Ri-Bhoi ha ka jingpynap shrip ha ka Sngi Saitjaiñ ki la ïoh ban kurup haduh 9 kilo u Ganja na kawei ka trok kaba dang hiar sha Guwahati.
Ha ka jingïakren bad ki lad pathai khubor u Officer Incharge jong ka Nongpoh Police Station u Michael Marak u la ïathuh hadien ka jingïoh jingtip kaba bniah na ki tnat syntiat ki Pulit ki la pynap shrip ha surokbah National Highway ha ka thaiñ Nongpoh bad dei ha ka por kumba 10:00 baje mynstep ki Pulit ki la ïoh bat ïa kawei ka trok kaba don ïa u Number NL 02 N 2630.
Ha ka jingtalasi ïa kane ka kali, ki Pulit ki la lap bun tylli ki song hynrei napdeng kine ki song tang ar tylli ki dei kiba la ïa u song Ganja katba ha kiwei ki song la shu thep da ki dieng kait ba la song lang kumjuh ba la suba ruh ba dei tang ka jingpynthame ban ïoh khaii tuh ïa u Ganja.
Ki Pulit ki la kem noh ïa u nongñiah jong ka trok u ba la tip kyrteng kum u Geramsha Boro 24 snem ka rta na ka shnong Bhalupung Myrangsre, Tezpur bad ka jingtohkit ka dang ïaid shakhmat ban lap shuh shuh ïa kiba donkti.
