Shillong, Nailar, 02: Ka Meghalaya Lokayukta, Shillong ha ka 28 tarik u bnai ba ladep ka la pynmih ia ka hukum ba la pynngat hapoh ka kyndon Prevention of Corruption Act, 1988 (as amended) ia u Chief Executive Member (CEM) barim jong ka Garo Hills Autonomous District Council (GHADC) u Denang T. Sangma bad ia ki MDC barim kiba kynthup ia u Augustine R. Marak, u Brilliant R. Sangma, u Dipul R. Marak, u Kurosh M. Marak, u Winnison Ch. Marak, u Dolly K. Sangma, u Bhupen Hajong, u Sukaram K. Sangma.
Nalor kine ki 9 ngut, ka Meghalaya Lokayukta ka la pynngat kyndon ruh ia u Secretary jong ka GHADC u Hewingson A. Sangma bad ia ki arngut ki Kontraktor kiba kynthup ia u Sanjay A. Sangma bad ia u Dolrish D. Sangma.
Kine ki la shah pynngat kyndon halor ka jingkynnoh donkti ha ka jyrsieh bamsap hadien ba u President jong ka Human Rights and Anti-Corruption Youth Power of India (HRACYPI) u Kingstone Bolwari Sangma u la mudui pyrshah ia ki sha ka Meghalaya Lokayukta.
Ha ka hukum ba la pynmih da u Chairperson jong ka Meghalaya Lokayukta u Bah Bhalang Dhar, la bthah ia u Director of Prosecution ban phah ia ki case record sha u Public Prosecutor jong ka West Garo Hills, khnang ban ioh pynsdang noh ia ka jingtian bishar ha ka Special Court jong ka West Garo Hills.
Ha u kyrwoh ba la phah sha ki lad pathai khubor ha ka Sngi Balang, u Kingstone u la pyntip ba ha u snem 2021 u la mudui pyrshah ia u MLA ba mynta jong ka NPP na Mahendraganj Constituency u Sanjay A. Sangma bad ia kiwei pat halor ka jingbym trei pyndep ia ka projek ban shna ia ka Member Hostel ha Tura kaba kot T.6,01,31,100.00 klur bad ia kane ka pisa la bhah lyngba ka Special Assistance jong ka Central Plan Scheme na ka bynta u snem 2015-2016 ha kaba ka Ministry of Finance ka la pyllait ia ka pisa kaba kot T. 100.71 klur kum ka Grant-in-Aid sha ka GHADC ban shna ia ka Schedule Tribe Areas.
U la iathuh, ka Lokayukta kaba la pynlong ia ka jingtohkit ba malu mala nyngkong eh ka la lap tyngkreiñ ia ki jingduna ha kaba iadei bad ka jingpyntreikam ia kane ka projek bad mar mar la bthah ban pynlong ia ka jingtohkit kaba bniah.
“Hadien ba la ioh ia ka jingbthah na ka Lokayukta u Anil Sangma, MPS (Rtd.) uba dei u dkhot jong ka Inquiry Wing jong ka Lokayukta u la pynlong ia ka jingtohkit kaba bniah bad phah ruh ia ka kaiphod tohkit sha ka Lokayukta bad katkum ka jinglap na ka kaiphod tohkit, ka Lokayukta ka la pynngat kyndon ia ki MDC ba la kdew kyrteng haneng, ia ki kontraktor bad ia ki nongtrei jong ka GHADC,” la ong u Kingstone. Hadien ba la ioh ia ka jingpynngat kyndon bad ia ka kaiphod tohkit ba la phah da u Inquiry Wing jong ka Lokayukta, ka Special Court, Tura ka la pynmih ia ka hukum ban shong bishar noh ia kane ka kam ha ka 29 tarik, Nailar, 2023.
