Shillong, Nailar, 02: Ka Khasi Students Union (KSU) West Jaiñtia Hills District ka la maham tyngeh ia ki dkhot jong kawei ka kynhun kieng atiar kaba la tip kum ka United People’s Front of Karbi Longri (UPFKL) kiba thmu ban pyntieng pynsmiej ia ki Khasi-Pnar kiba shong basah ha ki shnong kiba hap hapoh ka thaiñ Block-1.
“Hadien ba ka jingmih ha ki lad pathai khubor ba ka don kawei ka kynhun kieng atiar kaba la tip kum ka United People’s Front Of Karbi Longri (UPFKL) kiba thmu ban pyntieng pynsmiej ia ki Khasi-Pnar kiba shong basah ha Block-1, ka KSU, West Jaintia Hills District Unit ka phah ia une u kyrwoh khubor sha ki paradoh parasnam kiba don ha ki jaka bad ia baroh kiba shong basah markhap bad ka jylla Assam ba kim dei ban tieng bad ban shong syier, ka Seng kan long kaba la kloi ban ai ia ka jubab ia kita ki Kaikhlaw kiba thmu ban wanrah ka jingpyntieng bad ban iuhroit ia ka hok ka kynti ki paid Khasi-Pnar kiba sah ha Block-1,” ong u kyrwoh na u Publicity Secretary ka KSU West Jaiñtia Hills District Unit u samla Juhhi Tariang.
Ka Seng ka kyntu ia ki paradoh parasnam ban kin iaid kin ieng kumba ju long baroh shikatta bad ban kamai kajih laitluid ha la ka jong ka khyndew lajong.
Ka Seng ka Maham ruh ia UPFKL lada ka kwah ban iatyngkhuh ka Seng ka la long kaba la pynkhreh ban mih ha madan thma. “Lada jia eiei ia ki doh ki snam ki jong ngi kiba shong ha kitei ki jaka ka Sorkar Assam bad ka Sorkar Meghalaya ki dei ban shim ka jingkitkhlieh,” la bynrap u kyrwoh na ka Seng.
