Shillong, Nailur, 11: Saw ngut ki snar nonglute kiba ju mlien ban lute na ki trok bad ïa ki kali ha surokbah National Highway ha kylleng ki jaka ha Ri-Bhoi la kumba katto katne por ki la ngat ha shrip jong ki Pulit katba ki dang lute na ki trok kit dohkha ha ka thaiñ Shangbangla ha surokbah National Highway ha Ri-Bhoi.
U Superintendent of Police ka Ribhoi District, u Jagpal Singh Dhanoa ha u kyrwoh ba la phah sha ki lad pathai khubor u la ïathuh ba ki nonglute ki la khang kdong ïa ka kawei ka kali Bolero Camper kaba la ñiah da u Abu Sadek bad u Md Dildar Hussain na Morigaon, Assam da kaba pyndonkam da kawei ka kali Alto kaba don ïa u number AS-01 FN 4202. Hadien kata, ki la sei jubor ïa u Sadek bad ïa u Hussain napoh ka kali bad shoh pynmynsaw ruh ïa kine ki arngut bad lute ïa ka pisa bad ïa ki mobile phone.
Ki Pulit ka Ri-Bhoi kiba la ïoh jingtip halor kane ka jingjia, da ka jingïarap lang ka kynhun ki Pulit Special Operation Team (SOT) bad CRPF ki la pynlong ka jingpynap shrip ha surokbah National Highway ha Nongpoh Ribhoi hapoh ka jingïalam jong u Sub Inspector SR Marak ha kaba ki la ïohkem nyngkong eh ïa u Ricky Tangsang (uba sah ha Sajer, Nongpoh) na kawei ka kali Alto hajan Pahamsyiem bad ha kane ka por u Mustafa Lyngdoh (uba sah ha Umlyngkdait, Nongpoh) u la lait phet da ka said na kti jong ki Pulit.
Tang hadien shiteng kynta, ha ka jingthwet jong ki Pulit ki la ïoh kem sa ïa u Mustafa Lyngdoh uba la phla ba ki dang don sa ar ngut kiba donkti ha ka kam lute ba kynthup ïa u Kyrshanbor Marweiñ (uba sah ha Mawroh, Nongpoh) bad u Shem Warjri (uba sah ha Umsning Proper-A) kiba la pyndonkam da kawei ka kali Baleno bym don ïa u number plate. Ïa kine ki arngut ruh la ïohkem kham hadien da ki Pulit.
Ïa ki saw ngut ki nonglute kiba shah kem la ïalam sha Civil Hospital ban leh ïa ka Medical Examination bad ki Pulit ki la register case ha Nongpoh Police Station hapoh ka Section 126 (2)/309 (4)/115 (2)/315(3) BNS.
Ki Pulit ki la kurup noh ïa ka kali Alto bad ïa ka kali Baleno kynthup ruh 6 tylli ki mobile phone bad ka pisa T.6750 hajar.
Ka jingtohkit ïa ki saw ngut ki snar nonglute ka dang ïaid shakhmat ban ïohkem shuh shuh ïa kiwei pat kiba donkti.
