Shillong, Nailar 17: Ka Khasi Hills Autonomous District Council ka la rai ban khot ia ki samla pule kiba don ka mon ban wad jingtip shuh shuh shaphang ka riti ka dustur bad ka lariti jong ka jaidbynriew Khasi khnang ban buh jingthoh na ka bynta ka jingmyntoi jong ki longdien ka pateng ka ban sa wan.
Ha ka jingiakren bad ki lad pathai khubor ha ka sngi palei, u Chief Executive Member jong ka Khasi Hills Autonomous District Council u Bah Pyniaid Sing Syiem u la iathuh ba ki don 17 tylli ki bynta ban wad jingtip shuh shuh bad ban tih bniah halor kane ka bynta.
U la iathuh ruh ba ia kane ka kam la bynshet ha u Executive Member uba peit ia ka tnat Pule Puthi jong ka council da ka jingiarap ban bei pisa da ka ka sorkar Jylla.
“Ngi la iakynduh ruh la ar sien kynthih ia u Myntri Rangbah Conrad Kongkal Sangma halor kane ka jingthmu bad ka la long ka jingiakren kaba seisoh ha kaba u Myntri Rangbah ruh u la kular ban bei pisa ia ka KHADC na ka bynta ban leh ia kane ka jingwad bniah halor ka riti ka dustur bad ia ka lariti jong ka jaidbynriew Khasi,” ong u Bah Syiem.
“Ngi ladep nadong shadong. Ngi ladep phah ruh ia ka jingtyrwa sha ka Sorkar Jylla na ka bynta ban mang pisa halor kane ka jingthmu,” u la bynrap.
