Shillong, Jymmang, 14: Ka Sports Authority India (SAI) Training Centre, Shillong ha ka sngi Ba-ar ka la pynlong ïa ka prokram wad khynnah ïalehkai ba kynsai lane ka Talent Identification Program kaba hap hapoh ka Khelo India Rising Talent Hunt (KIRTI-MyBharat), ha Shillong Public School.
Ha kane ka prokram (2nd Assessment Camp) kaba tang shi sngi la ïashim bynta da 199 ngut ki khynnah kiba na katei ka skul ha ki ar tylli ki jingïalehkai kata ka Athletics bad Football.
Kane ka long ka sien ba ar ba pynlong ïa katei ka prokram bad kham hashwa ha u Ïaïong mynta u snem la pynlong ha SAI Training Centre kaba ha NEHU ha kaba la wan shim bynta da kumba 527 ngut ki khynnah kiba na kylleng ki district jong ka Jylla ha ki jingïalehkai Athletic, Boxing bad Football.
Katkum ka jingpyllait khubor da katei ka shlem ai jinghikai la ong ba ki la don 88 ngut ki khynnah kiba iashim bynta ha ka Athletic kynthup ia 53 ngut ki shynrang bad 35 ngut ki kynthei. Katba ha ka Football ki la don 111 ngut ki khynnah kynthup ia 102 ngut ki shynrang bad 9 ngut ki kynthei.
Ka jingthmu jong ka tnat ïalehkai jong ka Sorkar Pdeng ka long ban ithuh ïa ki sap ba kyrpang jong ki khynnah bad ban ai jinghikai pura ïa ki lyngba ka jingdon ïa ki jaka ïalehkai kiba paka namar ka jingangnud hi ka long ban sei ïa ki khynnah ïalehkai ki ban paw haduh ki lympung ïalehkai shabar ri kum ka Olympic bad kiwei.
Ha kane ka sngi la sdang da ka jingpynrung kyrteng ïa kitei baroh 199 ngut ki khynnah ki khynnah kiba la wan sha kane ka prokram ha la ki jong ki rta ki jong ki, hadien la bud sa ka jingthew jingkhia, jingthew ïa ka rynïeng, kumjuh kiwei ki test, nalor ka jingpynmareh, jingkynthih, jingkawang bol da dien (back throw) bad jingïalehkai phutbol.
