Shillong, Jymmang 14: Ki runar ki bym lah ban tip ki la jynrat bad tuh bun tylli ki Diengphna napoh ka Lum Jingtep jong ka Balang Catholic kaba don ha Tura, West Garo Hills.
Katkum ka khubor ba la iohlum na ki Pulit, la ïathuh ba ki runar ki la jynrat haduh 19 tylli ki diengphna ba shna da ki nar na ki lum jingtep bad pynjulor haduh 15 tylli.
Ki Pulit ki ïathuh ba kane ka la jia ha u Lum Jingtep ka Cathedral Parish kaba don ha R.C Road, Tura marjan ka ïng Bishop.
Ki Pulit ki ïathuh ba ki runar ki la ieh noh ia kiwei pat ki diengphna ba la shna da ki dieng lyntang. Halor kane ka jingjia, ki Pulit ki la ïohpdiang ïa ka ejahar bad ka jingtohkit mynta ka la ïaid shakhmat.
Ha ka jingtohkit ki Pulit ki la ïoh kurup 8 tylli ki diengphna nar na ka jaka buh tiar jot ha Chandmari, Tura.
Ki briew kiba trei ha kane ka jaka ki la pyntip ba arngut ki samla shynrang ki la wan da ka kali Auto Rickshaw bad ki la weng ïa kine ki diengphna barim ban bujli da kiba thymmai.
