Shillong, ‘Nailar, 09: Ki lai tylli ki shnat treikam jong ka KSU ba kynthup ïa ka Sawsymper Circle, ka Lawbah Border Area Circle bad ka Balat Border Area Circle da ka jingïasnoh kti lang jong ka KSU South West Khasi Hills District ki la pynthikna ba ka jingshong kyllaiñ myngngor ba la pynbeit da ka seng ha ka 10 tarik mynta u bnai ha ïew Mawsynram kan ïaid beit kumba la pynbna dang shen na ka daw ka jingmynthi jong ka Sorkar Jylla ban pynurlong ïa ka jingdawa ban kyntiew kyrdan Civil Sub Division ïa ka Mawsynram Community and Rural Development Block.
Kum ban shu pynkynmaw, ka Mawsynram C&RD Block ka la don mynta la palat 62 snem hynrei kaba sngewsih ka long ba ka mat ban kyntiew sha ka kyrdan Civil Sub Division ka shu dei tang ka mat shim kabu jong ki seng saiñpyrthei ha ki rynsan ïalap elekshon, la ong ka KSU ha u kyrwoh ba la soi da u Samborlang Shabong, President ka SU Lawbah Border Area Circle, u Belingstar Lyngkhoi President ka KSU Sawsymper Circle bad u Bonsen Snaitang, President ka KSU Balat Border Area Circle.
Ha ka jingshisha ka KSU ka la pyrshang ban ïa kynduh ïa u Myntri Rangbah ka Jylla u Conrad K. Sangma hynrei kaba sngewsih ka long hadien ka eleksshon u la leh bym patiaw bad sngap manman halor kane ka mat.
Ka KSU ka khot ka wer ïa ki paitbah ka thaiñ Mawsynram C&RD Block ba kin ïasnoh kti lang ha ka jingïakhih kaba jai jai ka ban sdang naduh ka por 11:00 baje ha ïew Mawsynram ban pynurlong noh ïa kane ka mat jingdawa jong ki paidbah.
Ka KSU ka khot kawer naduh ki nongïalam Hima, ki nongmihkhmat paidbah, ki nongïalam Raid, ki nongïalam shnong, ki seng longkmie, ki Seng Samla Shnong, ki kynhun bapher bapher jong ka Mawsynram C& RD Block ban ïa mih ryntih khnang ban pynbor ïa ka Sorkar ban pynurlong noh ïa ka Mawsynram Civil Sub Division kumba ka Sorkar ka la shu kular tang da ka ktien sha ki paidbah baroh shikatta.
